Журналістаў Інанец і Лычаўку, якія адбываюць “хатнюю хімію”, унеслі ў “экстрэмісцкі” спіс

У новыя “экстрэмісты” ведамаства запісала адразу 18 чалавек, цяпер агульная колькасць у базе сілавікоў складае 2388 прозвішчаў.

Пад нумарамі 2380 і 2381 цяпер значацца журналісты Сняжана Інанец і Аляксандр Лычаўка – муж і жонка, пасля трох месяцаў папярэдняга ўтрымання ў мінскім следчым ізалятары асуджаныя да абмежавання волі (так званая “хатняя хімія”) за ўдзел у нядзельным маршы 2020 года.

Да арышту Аляксандр Лычаўка супрацоўнічаў з выданнем The Vil­lage, спецыялізаваўся на краязнаўчай журналістыцы. Сняжана Інанец раней была ў камандзе інфармацыйнага партала Tut.by, а пасля яго разгрому ўладамі працавала ў рэдакцыі інтэрнэт-рэсурсу Onlin­er.

Сувязь з сужэнцамі знікла 6 кастрычніка 2022 года. А ўжо на наступны дзень у адным з тэлеграм-каналаў, блізкім да ГУБАЗіК (падраздзяленне МУС практычна цалкам сканцэнтравалася на барацьбе з іншадумствам) з’явілася традыцыйнае “пакаяльнае відэа”. У кадры затрыманыя вымушана “прызнаваліся”, што былі падпісаныя на “дэструктыўныя каналы”, а таксама ўдзельнічалі ў акцыі пратэсту.

Неўзабаве іх перавялі ў сталічны СІЗА №1 паводле ч. 1 арт. 342 Крымінальнага кодэкса — “арганізацыя групавых дзеянняў, якія груба парушаюць грамадскі парадак і спалучаюцца з непадпарадкаваннем прадстаўнікам улады або пацягнулі парушэнне працы транспарту, прадпрыемстваў, устаноў ці арганізацый пры адсутнасці прыкмет больш цяжкага злачынства”. Артыкул нефармальна атрымаў назву “народнага”, паколькі на яго падставе прыцягнутыя да адказнасці (і працягваюць затрымлівацца) шматлікія апаненты цяперашніх беларускіх уладаў.

Праваабарончая супольнасць прызнала зняволеных мужа і жонку палітычнымі вязнямі.

Чаканне судовага працэсу невытлумачальна зацягнулася і пераваліла ў 2023 год. Справу журналістаў накіравалі на разгляд у суд Першамайскага раёна Мінска. Прадстаўнік пракуратуры першапачаткова запытваў для Сняжаны Інанец 2,5 гады абмежавання волі без накіравання ў папраўчую ўстанову, для Аляксандра Лычаўкі – 3 гады паводле аналагічнай санкцыі.

Фінальны вердыкт быў агучаны 13 студзеня: Сняжана Інанец атрымала на паўгода меней, чым патрабавала абвінавачванне – 2 гады так званай “хатняй хіміі”, а вось Аляксандр Лычаўка “скідак” ад правасуддзя не дачакаўся – 3 гады абмежавання волі. Пакаранне ў абодвух выпадках – за “ўдзел у несанкцыянаваных масавых мерапрыемствах” падчас шматтысячных акцый у Мінску. 

Пасля агалошвання судовага рашэння мужа і жонку вызвалілі з‑пад варты ў зале суда. Да таго яны атрымалі больш чым трохмесяцовы досвед зняволення ў мінскім следчым ізалятары.

На гэты момант дакладна невядома, ці скарысталіся сужэнцы правам на абскарджанне прысуду, да агучвання канчатковага вердыкту застаючыся пад падпіскай аб невыездзе, або ўжо пачалі адбываць свой “хатні арышт”.