Журналістаў “Ганцавіцкага часу” выклікалі ў міліцыю і пратрымалі больш за дзве гадзіны
25 сакавіка 2021
Карэспандэнты рэгіянальнай незалежнай газеты “Ганцавіцкі час” Сяргей Багроў і Аляксандр Пазняк раніцай 25 сакавіка наведаліся ў Ганцавіцкі РАУС, куды іх выклікалі напярэдадні позвамі.
Фармальнай падставай для выкліку журналістаў былі падзеі летам мінулага года, калі ў Ганцавічах нехта размаляваў фарбай кіёскі гандлёвай сеткі “Табакерка”. Супрацоўнікаў міліцыі цікавіла, што вядома Сяргею Багрову і Аляксандру Пазняку пра тое здарэнне.
Але фактычна гутарка мела і “прафілактычны” змест: журналістаў папярэдзілі, каб не бралі ўдзел у магчымых несанцыянаваных акцыях. Дарэчы, напярэдадні прадстаўнікоў “Ганцавіцкага часу” выклікалі ў мясцовую пракуратуру, каб афіцыйна папярэдзіць “пра недапушчальнасць парушэння заканадаўства”.
Як распявёў службе маніторынгу ГА “БАЖ” Сяргей Багроў, магчыма міліцыю зацікавілі б фотаапараты і мабільныя тэлефоны журналістаў, аднак карэспандэнты вырашылі ісці ў РАУС без лічбавай тэхнікі.
@bajmedia
