У Мінску пачаўся суд па справе TUT.BY

Судзіць будуць генеральнага дырэктара «ТУТ БАЙ медыя» Людмілу Чэкіну, галоўнага рэдактара TUT.BY Марыну Золатаву.

Вызваленыя раней з СІЗА пад падпіску аб нявыездзе тры з пяці фігурантак «справы TUT.BY» — Вольга Лойка, Алена Талкачова і Кацярына Ткачэнка — з’ехалі з Беларусі і на судзе сёння не будуць.

Людмілу Чэкіну абвінавачваюць па трох артыкулах КК Беларусі:

— ч. 2 арт. 243 (ухіленне ад выплаты падаткаў, збораў у асабліва буйным памеры) — да сямі гадоў пазбаўлення волі;

— ч. 4 арт. 16, ч. 3 арт. 130 (арганізацыя наўмысных дзеянняў, накіраваных на распальванне расавай, нацыянальнай, рэлігійнай альбо іншай сацыяльнай варожасці або варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці, учыненых групай асоб або выклікаўшых цяжкія наступствы) — да 12 гадоў пазбаўлення волі;

— ч. 4 арт. 16, ч. 3 арт. 361 (кіраўніцтва заклікамі да дзеянняў, накіраваных на прычыненне шкоды нацыянальнай бяспецы Рэспублікі Беларусь, учыненыя з выкарыстаннем сродкаў масавай інфармацыі або глабальнай камп’ютарнай сеткі інтэрнэт) — да пяці гадоў пазбаўлення волі.

Марыну Золатаву таксама абвінавачваюць па трох артыкулах:

— ч. 2 арт. 243 (ухіленне ад выплаты падаткаў, збораў у асабліва буйным памеры) — да сямі гадоў пазбаўлення волі;

— ч. 3 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці, учыненых групай асоб або выклікаўшых цяжкія наступствы) — да 12 гадоў пазбаўлення волі;

— ч. 3 арт. 361 (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь, учыненыя з выкарыстаннем сродкаў масавай інфармацыі або глабальнай камп’ютарнай сеткі інтэрнэт) — да пяці гадоў пазбаўлення волі.

Лойка і Талкачова, як раней паведамляла Генпракуратура, абвінавачваюцца ў дапамозе ва ўхіленні ад выплаты падаткаў, распальванні сацыяльнай варожасці, распаўсюдзе матэрыялаў з заклікамі да дзеянняў, накіраваных на прычыненне шкоды нацыянальнай бяспецы Рэспублікі Беларусь.

Ткачэнка абвінавацілі ў дапамозе ва ўхіленні ад выплаты падаткаў, актыўным удзеле ў групавых дзеяннях, якія груба парушаюць грамадскі парадак.

Пагром партала адбыўся раніцай 18 мая 2021 года. У той дзень затрымалі 15 чалавек: з вобшукам прыйшлі у рэдакцыю і дадому да некаторых супрацоўнікаў. Цягам года большасць выпусцілі, у СІЗА засталіся толькі Марына Золатава і Людміла Чэкіна.

Чытайце яшчэ:

Па дарозе ў альтэрнатыўную рэальнасць. Зварот рэдакцыі «Люстэрка» ў сувязі з пачаткам суда па справе TUT.BY

Як бы хто ні стараўся, свабоду слова не забіць

Слонімскі журналіст і літаратуразнавец Сяргей Чыгрын выйшаў на волю пасля арышту