Тэлеграм-канал «БАЖ Беларуская асацыяцыя журналiстаў» прызналі «экстрэмісцкім»

Паводле інфармацыі на сайце баранавіцкай раёнкі, тэлеграм-канал «БАЖ Беларуская асацыяцыя журналiстаў» прызнаны экстрэмісцкім па рашэнні суда Баранавіцкага раёна і горада Баранавічы ад 13 лютага.

Як вынікае з паведамлення, у суд з адпаведным патрабаваннем звярнуўся баранавіцкі міжраённы пракурор Аляксандр Карлюк. Звестак пра ідэнтыфікатар інтэрнэт-рэсурса няма. Тэлеграм-канал прызнаны «экстрэмісцкім» нібыта «ў сувязі з размяшчэннем інфармацыі антыдзяржаўнай і экстрэмісцкай тэматыкі».

У жніўні 2021 года Вярхоўны суд Беларусі ліквідаваў грамадскае аб’яднанне «Беларуская асацыяцыя журналістаў» на пазоў Міністэрства юстыцыі. 28 лютага 2023 года Камітэт дзяржаўнай бяспекі Беларусі назваў «групу грамадзян з ліку прадстаўнікоў няўрадавай грамадскай арганізацыі «Беларуская асацыяцыя журналістаў» экстрэмісцкім фарміраваннем».

8 чэрвеня 2023 года рашэннем суда Цэнтральнага раёна горада Мінска былі прызнаныя «экстрэмісцкімі матэрыяламі»:

• інтэрнэт-сайт з назвай «Беларуская асацыяцыя журналістаў» (ідэнтыфікатар: https://baj.by) і яго электронная копія (ідэнтыфікатар: https://baj.life);

• акаўнт у сацыяльнай сетцы Insta­gram з (ідэнтыфікатар: www.instagram.com/baj.by);

• старонка ў сацыяльнай сетцы Face­book з назвай «БАЖ — Беларуская асацыяцыя журналістаў» (ідэнтыфікатар: https://www.facebook.com/bajbelarus);

• акаўнт у сацыяльнай сетцы Twit­ter з назвай «БАЖ | BAJ» (ідэнтыфікатар: https://twitter.com/baj_by);

• лагатып арганізацыі.

Тады ж экстрэмісцкай інфармацыйнай прадукцыяй быў прызнаны  і Telegram-канал з назвай «БАЖ — Беларуская асацыяцыя журналістаў» (ідэнтыфікатар: https://t.me/bajby ).

На пачатку 2024 года Аператыўна-аналітычны цэнтр пры прэзідэнце РБ забраў у Беларускай асацыяцыі журналістаў даменнае імя ў зоне .by нібыта ў сувязі з выяўленымі парушэннямі. Амаль 20 гадоў Беларуская асацыяцыя журналістаў мела сайт Baj.by на гэтым дамене і прасоўвала праз яго стандарты журналісцкай працы, права на выказванне і каштоўнасці правоў чалавека.

Чытайце яшчэ:

«Як журналісты сталі галоўнымі ворагамі Лукашэнкі». Выйшаў новы фільм пра беларускіх рэпарцёраў, пратэсты і рэпрэсіі

«Стан журналіста залежыць ад стану яго рэдакцыі». Барыс Гарэцкі — пра праблемы медыяў у эміграцыі

Журналіст праекта Dekoder: «Доўгі час немцам пра падзеі ў Беларусі і Украіне распавядалі карэспандэнты з Масквы»