Супраць журналіста і праваабаронцы Уладзіміра Хільмановіча распачалі крымінальную справу

У справе фігуруюць дзве часткі артыкула 361−4 Крымінальнага кодэкса — частка 1 (вярбоўка, іншае уцягванне асобы ў экстрэмісцкую дзейнасць, навучанне, а таксама іншае садзейнічанне экстрэмісцкай дзейнасці), а таксама частка 2 (тыя ж дзеянні, здзейсненыя паўторна, альбо групай асобаў па папярэдняй змове, альбо на пасадзе з выкарыстаннем сваіх службовых паўнамоцтваў), паведамляе «Гарадзенская праваабарона».

Па гэтым артыкуле пагражае абмежаванне свабоды да пяці гадоў альбо пазбаўленне свабоды да сямі гадоў.

Уладзімір Хільмановіч ужо два з паловай гады не жыве ў Беларусі. Тыдзень таму ў кватэры па месцы яго прапіскі паводле пастановы аб накладанні арышту на маёмасць апісалі мэблю і лядоўню.

1 снежня 2023 года ў кватэры жонкі Уладзіміра Хільмановіча, дзе ён жыў з 2014 па 2021 год, правялі ператрус. Забралі працэсар кампутара, старое пасведчанне, 25 кніг, музычны дыск, паштовыя маркі, канверты, паштоўкі, буклеты, значкі, газеты. Таксама апісалі бытавую тэхніку.

Каментар Уладзіміра Хільмановіча адносна сітуацыі прыводзіць Радыё Рацыя: 

«Я не ведаю дакладна, якія эпізоды фігуруюць у справе і ў чым канкрэтна, у якім «экстрэмізме» мяне абвінавачваюць. Але ўпэўнены, што гэта датычыць маёй журналісцкай і праваабарончай дзейнасці. Мае артыкулы на грамадска-палітычную тэматыку, праваабарончыя каментары шмат разоў змяшчаліся на Беларускім Радыё Рацыя і ў іншых беларускіх незалежных медыях. Гэта стоадсоткава палітычны пераслед. Сістэма татальнага беззаконня, якая зараз пануе ў Беларусі, не пакідае па-за сваёй увагай аніводнага грамадзяніна, які хоча рэалізоўваць свае канстытуцыйныя правы і асмельваецца мець крытычны погляд на палітыку дзяржаўных органаў у Беларусі. Не маю ніякіх ілюзій і не сумняваюся, што яны давядуць гэтую чарговую палітычную крымінальную справу да карнага выраку супраць мяне».

Чытайце яшчэ:

Аляксандра Манцэвіча перавялі ў следчы ізалятар у Баранавічах

Паведамляецца пра ператрус у галоўнага рэжысёра Віцебскай тэлерадыёкампаніі

Дзень народзінаў за кратамі адзначае Ірына Леўшына, галоўны рэдактар БелаПАН