Спынены крымінальны пераслед журналіста Алеся Дашчынскага

Згодна з тэкстам пастановы аб затрыманні, Алеся Дашчынскага  падазравалі паводле ч. 1 арт. 342 Крымінальнага кодэкса Беларусі – “арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх”.

Нагадаем, што 16 ліпеня 2021 года сілавікі штурмавалі мінскі офіс Радыё “Свабода”: выламалі дзверы, вырвалі камеры відэаназірання, канфіскавалі тэхніку, а што не змаглі вынесці, проста пашкодзілі.

Паралельна праваахоўнікі прыйшлі да некаторых карэспандэнтаў-фрылансераў, якія супрацоўнічалі з медыя, – Алеся Дашчынскага, Алега Груздзіловіча, Інэсы Студзінскай. Усіх іх пасля ператрусаў затрымалі і адвезлі ў мінскі ізалятар часовага ўтрымання на Акрэсціна. 

Да таго названыя журналісты былі пазбаўленыя акрэдытацыі Міністэрства замежных спраў Беларусі ў жніўні 2020 года разам з іншымі карэспандэнтамі большасці замежных СМІ. Праваабарончая супольнасць прызнала затрыманых супрацоўнікаў Радыё “Свабода” палітычнымі вязнямі.  

Алесь Дашчынскі знаходзіўся за кратамі да 23 ліпеня 2021-га, ягоныя калегі прабылі там на тры дні больш. У выніку да рэальнага тэрміну асудзілі толькі Алега Груздзіловіча – сёлета ў сакавіку суд Савецкага раёна Мінска пакараў яго 1,5 гадамі калоніі нібыта за “арганізацыю масавых беспарадкаў і ўдзел у іх”. За кратамі ён прабыў амаль 9 месяцаў, пасля чаго нечакана апынуўся на волі і быў практычна выдвараны ў Літву. 

Пасля вызвалення з турмы на Акрэсціна Алесь Дашчынскі знаходзіўся ў статусе падазраванага і пад падпіскай аб нявыездзе з Беларусі. Цяпер гэтыя абмежаванні знятыя. 

Алесь Дашчынскі родам з Пастаўшчыны. Дарэчы, у бацькоўскім доме яго і затрымалі, і ўжо адтуль перавезлі ў мінскую кватэру, дзе адбыўся вобшук.

Раней журналіст працаваў у нямецкай службе Беларускага дзяржаўнага радыё, валодае нямецкай мовай. З’яўляецца экспертам па Германіі, палітычных кантактах і сувязях з Беларуссю.

Пасля гэтага супрацоўнічаў з “Радыё Рацыя”, а з 2004 года меў афіцыйную акрэдытацыю МЗС як карэспандэнт Радыё “Свабода”.

Калегі напаўжартам называюць Алеся Дашчынскага “пастаўшчыком  эксклюзіваў”. Настойлівасць і ўпартасць у здабычы закуліснай інфармацыі паставілі яго ў шэраг самых вядомых і аўтарытэтных журналістаў краіны.

Пасля пачатку крымінальнай справы Алесь Дашчынскі журналістыкай не займаўся.   

Чытайце яшчэ:

Вызваленая журналістка Студзінская расказала пра галадоўку, сукамерніц і катаванне музыкай на Акрэсціна

Ліпень-2021: зноў масавая атака сілавікоў на журналістаў па ўсёй краіне

У Слоніме «за рэпост» затрымалі вядомага журналіста і пісьменніка Сяргея Чыгрына