Штотыднёвік “Новы час” пачаў выпускаць дадатак “Эканамічная Беларусь”

Як распавяла галоўны рэдактар штотыднёвіку “Новы час” Аксана Колб, эканамічны дадатак першыя месяцы будзе выходзіць на 4‑х старонках. Але плануецца, што ўжо напрыканцы восені “Эканамічная Беларусь” істотна патаўсцее — да 12-ці старонак.

“Мы ўсіх запрашаем да супрацоўніцтва, у тым ліку і беларускі бізнэс.

Ідэя выпуску такога дадатку з’явілася яшчэ летась. Увесь гэты час мы шукалі бізнэсоўцаў,  якія б хацелі чытаць пра эканоміку па-беларуску, а таксама былі б гатовыя падтрымаць нашую ініцыятыву. І, як бачыце, знайшлі такіх. Увогуле, цяпер бізнэсу па-беларуску становіцца ўсё больш, павялічылася колькасць беларускамоўнай рэкламы. Таму з’яўленне нашага эканамічнага дадатку цалкам лагічнае”, — гаворыць Аксана Колб.

Цікава, што папяровы штомесячны дадатак з’явіўся ў часы, калі многія выданні наадварот скарачаюць  свае папяровыя версіі.

“Мы дасюль упэўненыя, што папяровыя выданні патрэбныя кріане. Далёка не ўсе людзі шырока карыстаюцца інтэрнэтам. А ёсць і месцы, дзе інтэрнэту наогул няма. Напрыклад, гэта месцы зняволення. І, да слова, у “Новага часу” нямала такіх падпісчыкаў”, — тлумачыць рэдактар.

Пакуль эканамічны дадатак будзе выходзіць на чатырох палосах, ён будзе тэматычны. Першы нумар, натуральна, быў прысвечаны актуальнай тэме дэнамінацыі. У другім нумары плануюцца матэрыялы пра беларускі турызм.

Дарэчы, гэта не адзіны дадатак у “Новым часе”. Ужо шмат гадоў штомесяц выходзіць “Літаратурная Беларусь”. Напрыканцы чэрвеня выйдзе ўжо 118 нумар.

Штотыднёвік «Новы час» з’яўляецца грамадска-палітычным выданнем. Выходзіць цалкам па-беларуску.

У 2009 годзе  газета «Новы Час» была ўзнагароджаная прэміяй нямецкага фонду «Цайт». У 2008 годзе шэф‑рэдактар газеты «Новы Час» Аляксей Кароль быў узнагароджаны прэміяй імя Найта за якасную журналістыку ў цяжкіх умовах.