Прэзідэнцкая газета піярыць пуцінскага “кувалдыста” Прыгожына

“Евгений Пригожин подарил кувалду бойцам «Группы Вагнера»”, –інфармуе сваіх чытачоў/гледачоў орган прэзідэнцкай адміністрацыі, размяшчаючы пад уласным лэйблам ролік з сумна вядомым персанажам у бліжэйшым атачэнні расійскага прэзідэнта Уладзіміра Пуціна.

“Прыгожын наведаў асноўную базу «Групы Вагнера» ў Краснадарскім краі, куды прывёз “легендарную” баявую зброю «музыкантаў» ад знакамітых молькінскіх майстроў”, – гаворыцца ў падводцы да сюжэта.

Праўладнае выданне не канкрэтызуе, чым менавіта вядомыя тыя “майстры”, але расійскім журналістам вядома, што акурат на палігоне ў расійскім Молькіне паміж Краснадарам і Гарачым Ключом трэніруюцца наёмнікі прыватных ваенных кампаній перад адпраўкай на ўсход Украіны, Сірыю і ў краіны Афрыкі, а сама база лічыцца палявой штаб-кватэрай так званай “ЧВК Вагнера” на чале са згаданым Прыгожыным.

Іерархія ў кампаніі “Вагнер” нагадвае стыль падпарадкавання на зоне, дзе шмат гадоў  па крымінальных артыкулах правёў Яўген Прыгожын, а самасуд над “здраднікамі і ўхілістамі” стаў ледзь не візытоўкай ваенізаванага падраздзялення. Прычым у якасці зброі расправы чыясьці вычварэнская фантазія абрала кувалду. Менавіта яе “навагодне-падарункавы” фармат, як вынікае з сюжэта “СБ. Беларусь сегодня”, і прэзентаваў падначаленым галоўны “вагнеравец”.

“Вось прывёз вам новую распрацоўку ўзбраення, трэба падумаць наконт навучання, каб увесь асабісты склад умеў ёй працаваць, – паляпваючы па скрынцы, цынічна жартуе Прыгожын у размове з “інструктарамі”. – Самі спачатку вывучыце, адпрацуеце, разбярэцеся з тэхнікай прымянення, іншымі нюансамі… Перадаю пакуль у адзіным экзэмпляры (на ўдарнай частцы над выявай узброенага наёмніка выбіты надпіс “С новым годом-2023”, – заўвага), далей будзе больш”.

“ЧВК Вагнера” — неафіцыйнае ўзброенае фармаванне, існаванне якога не прапісана ніводным заканадаўствам, у тым ліку расійскім. Адзінай міжвольнай “легалізацыяй” стала ўключэнне групоўкі ў санкцыйныя спісы ЗША і Еўрасаюза за ўмяшанне ў справы іншых краін, а таксама негуманныя метады баявых дзеянняў на Данбасе, у Сірыі, ЦАР, Лівіі, Малі і несанкцыянаваную прысутнасць у Венесуэле, Мазамбіку, Судане, на Мадагаскары.  

Пакінулі “вагнераўцы” свой след і ў Беларусі. Незадоўга да прэзідэнцкіх выбараў 2020 года група “Альфа” Камітэта дзяржбяспекі, згодна з паведамленнямі афіцыйных СМІ, “затрымала 32 баевікоў замежнай прыватнай ваеннай кампаніі Вагнера”, якія падазраваліся ў спробе арганізацыі масавых беспарадкаў. Праўда, пры гэтым афіцыйны Мінск пакінуў без увагі просьбу Кіева перадаць “злачынцаў” пад трыбунал, а неўзабаве пасля ўмяшання Пуціна усіх вярнулі назад у Расію. 

Хоць фармальна “ЧВК Вагнер” лічыцца прыватнай кампаніяй, але, як вынікае з журналісцкіх расследванняў, насамрэч створана і дзейнічае пры Галоўным разведвальным упраўленні Генеральнага штаба расійскай арміі. Ідэйны лідар і заснавальнік фармавання Яўген Прыгожын — набліжаны да Уладзіміра Пуціна прадпрымальнік са сферы піцерскага общепита (адсюль і мянушка “кухар”), які дзякуючы свайму статусу не толькі стаў мільярдэрам, але і адыгрывае асаблівую ролю ў вайне ва Украіне

Пасля таго, як рэгулярная армія прадэманстравала надзвычай нізкую баяздольнасць і матывацыю, Прыгожын зрабіў стаўку на вярбоўку зняволеных у турмах, а наёмнікаў стымулюе абяцаннямі амністыі і высокімі заробкамі.

Чытайце яшчэ: 

«Просіць падручнікі, значыць, мае пляны на будучыню». Навіны былых гомельскіх журналістаў, якія трапілі за краты

Новыя метады пераследу ў 2022 годзе нязгодных з рэжымам Лукашэнкі

Паўлюк Быкоўскі: «Дзяржаўныя СМІ стараюцца не заўважаць прысутнасць расійскіх ваенных у Беларусі»