Палітзняволены Анджэй Пачобут перадае прывітанне ўсім БАЖаўцам: “Усё будзе добра”

Паводле Таццяны, ліст ад Анджэя Пачобута стаў для яе радаснай нечаканасцю, бо яна ўжо і не спадзявалася атрымаць адказы ад палітвязняў. За апошні час Таццяна адправіла знаёмым палізняволеным каля 30-ці паштовак-лістоў, ад даты напісання некаторым прайшло ўжо шмат часу, але зваротнай сувязі так і не было.  

“Я нават падумала, што лісты да палітвязняў проста выкідваюць, таму яны і не даходзяць, пра гэта ж пачалі казаць некаторыя актывісты з бліжэйшых гарадоў. І вось у сярэдзіне снежня прыйшла доўгачаканая вестка! І што асабліва радасна, ад калегі па журналісцкаму цэху, якога я вельмі паважаю”, — кажа Таццяна Смоткіна.

Анджэй Пачобут паведамляе, што ў яго ўсё стабільна (наколькі гэта можа быць у турме), што жыццё там працякае павольна і імкліва адначасова. Павольна, таму што дні цягнуцца, а імкліва, таму што пралятаюць тыдні. І за гэты час ён да падобнага парадоксу ўжо прызвычаіўся. Зазначае, што працягвае актыўную падрыхтоўку да суда, хоць па-ранейшаму дата яго яшчэ невядомая.

На думку Анджэя, усё сведчыць пра тое, што быць яму за кратамі яшчэ вельмі шмат часу. Але ён не губляе аптымізму, і настрой у яго бадзёры. Часам яму здаецца, што людзям на волі цяжэй, чым вязням. Таму просіць трымацца і верыць у тое, што ўсё будзе добра.

Таксама ён просіць перадаваць прывітанне ўсім агульным сябрам і калегам, асабліва Андрэю Бастунцу і Барысу Гарэцкаму. І зазначае, што ён заўжды мог разлічваць на БАЖ.

Яшчэ Анджэй Пачобут згадвае пра Глыбокае. Ён лічыць яго атмасферным мястэчкам з цікавай гісторыяй і спадзяецца, што з не менш цікавай будучыняй. Напрыканцы ліста Анджэй просіць запаліць знічы на могілках польскіх жаўнераў у Глыбокім, якія калісьці аддалі ўсё ў змаганні з таталітарызмам.

Анджэй Пачобут за кратамі з 25 сакавіка. Усяго ў няволі ў Беларусі цяпер 31 прадстаўнік медыя.

Коллеги в тюрьмах. Напишите им письмо поддержки! ВСЕ АДРЕСА