Міністр замежных спраў Польшчы выказаў салідарнасць са зняволеным журналістам Анджэем Пачобутам
20 снежня 2023
20 снежня споўнілася 1000 дзён, як палітзняволены журналіст Анджэй Пачобут знаходзіцца за кратамі. З гэтай нагоды рэдакцыя «Газеты Выборчай», дзе ён працаваў, зноў запатрабавала ад уладаў Беларусі вызвалення журналіста, піша Радыё Свабода.
«Мы ўвесь час просім польскія ўлады, міжнародныя арганізацыі і ўсю дэмакратычную супольнасць аказаць ціск на Беларусь у справе Анджэя. Каб пра Анджэя не забывалі», — напісалі калегі Пачобута.
Новы міністр замежных спраў Польшчы Радаслаў Сікорскі даў каментар выданю:
«Мы верым, што Анджэй хутка будзе на волі, бо, як ён сам сказаў: „нічога дрэннага не рабіў, закон не парушаў, нікуды не ўцячэ і дома“».
«Анджэй — журналіст, юрыст, папулярызатар гісторыі, актывіст Саюзу палякаў у Беларусі — знаходзіцца ў турме, бо хацеў, каб яго краіна была свабоднай, — адзначае Радаслаў Сікорскі. — І ў выніку стаў асабістым ворагам прэзідэнта Беларусі Аляксандра Лукашэнкі. За гэта яго асудзілі на 8 гадоў калоніі ўзмоцненага рэжыму.
Анджэй Пачобут — паляк у Беларусі — патрыёт сваёй беларускай краіны, які спалучае лепшае з нашай агульнай спадчыны. Для ўсіх нас ён стаў сімвалам незалежнага духу і веры ў ідэю свабоды. Ён сядзіць у турме, бо яго баіцца рэжым Лукашэнкі. Тое, што гэты шанавальнік польскай і беларускай культуры, які апявае нашу пераплеценую гісторыю, быў асуджаны, між іншым, за распальванне нацыянальнай варожасці, — гэта злоба аўтакратаў».
У Беластоку 22 снежня адбудзецца чарговая акцыя салідарнасці з Анджэем Пачобутам ды іншымі палітзняволенымі, паведамляе Беларускае Радыё Рацыя.
Анджэй Пачобут быў затрыманы 25 сакавіка 2021 года ў Гродна па так званай «польскай справе» разам з іншымі актывістамі Саюза палякаў Беларусі. За артыкул пра напад СССР на Польшчу ў верасні 1939-га Анджэя Пачобута абвінавацілі ў «распальванні варожасці па нацыянальнай прыкмеце». У публікацыі Пачобут назваў агрэсіяй напад СССР на Польшчу 17 верасня 1939 года.
Таксама ў матэрыялах крымінальнай справы фігуравалі заявы журналіста ў абарону польскай меншасці ў Беларусі, артыкул пра падаўленне беларускіх пратэстаў у 2020 годзе і тэкст ад 2006 года пра аднаго з камандзіраў польскага антыкамуністычнага падполля на Гродзеншчыне.
8 лютага 2023 года ў абласным судзе Гродна суддзя Дзмітрый Бубенчык прыгаварыў журналіста да 8 гадоў пазбаўлення волі з адбываннем у калоніі ўзмоцненага рэжыму. Зараз зняволены журналіст адбывае пакаранне ў калоніі ў Наваполацку. Там яго на паўгады адправілі ў памяшканне камернага тыпу, дзе спадар Пачобут будзе знаходзіцца да лютага 2024 года.
Чытайце яшчэ:
@bajmedia
«Прыярытызацыя беларускага кантэнту над расійскім». Святлана Ціханоўская перадала ў Google запыт ад журналістаў
18.01.2024
«Это абсурд». В Минске начинается самый массовый заочный суд по делу «аналитиков Тихановской» — вот их заявление
31.05.2024
Следчы камітэт распачаў «спецыяльную вытворчасць» супраць кіраўніка «Маланка Медыя» Паўла Марыніча
29.12.2023
На бацькоўскую хату кіраўніка «Белсата» наклалі арышт
09.10.2024
