Міністр інфармацыі: Супраць нас працуе сур’ёзная тэхналагічная машына

Арганізаваны Міністэрствам інфармацыі X Форум маладых журналістаў «Журналістыка сёння: тэрыторыя адказнасці» праходзіў 16 снежня ў Мінску. Да ўдзелу былі сабраныя 220 маладых журналістаў з рэспубліканскіх і рэгіянальных СМІ. Паводле арганізатара, форум быў накіраваны на падвышэнне кваліфікацыі, развіццё сацыяльнай і прафесійнай камунікацыі маладых журналістаў, фармаванне адзінай медыясупольнасці Беларусі.

Праўладныя журналісты выступалі з дакладамі, якія адлюстроўвалі «актуальную сітуацыю ў медыясферы» і былі прысвечаныя «вялікім магчымасцям рэгіянальнай прэсы, запатрабаванасці і важнасці фатаграфіі ў журналістыцы, феномену папулярнасці кароткіх відэа ў сацыяльных сетках, беларускай блогасферы і экстрэмальнай журналістыцы».

Міністр інфармацыі Уладзімір Пярцоў паведаміў прысутным, што ўся праўладная медыясупольнасць краіны знаходзіцца ў стане інфармацыйнай вайны. І далей пачаў выкрываць сваіх апанентаў.

«Нашыя апаненты вядуць агрэсіўную інфармацыйную палітыку па заваяванні  сэрцаў і розумаў маладых людзей, якія, гартаючы стужку сацсетак, не заўсёды могуць аддзяліць праўду ад няпраўды. Асабліва гэтае становішча небяспечнае цяпер, калі хуткасць пераважае над якасцю, над фактчэкінгам, да якога мы яшчэ нядаўна так заўзята звярталіся і не выдавалі інфармацыю, папярэдне яе не праверыўшы. Сёння, карыстаючыся падступнымі алгарытмамі сацсетак, апаненты вядуць дастаткова агрэсіўную працу па прасоўванні сваёй інфармацыі, якая ні на чым не заснаваная, але, тым не менш, выклікае негатыўныя эмоцыі ў людзей, і заахвочваюць іх здзяйсняць правіны», — сказаў Пярцоў.

Пасля ён наракаў на тое, што быццам моладзь толькі постфактум разумее, што павялася на фэйкі, укінутыя быццам псеўдоблагеркай ці іншым інфлюэнсерам, на якога маладыя людзі падпісаныя ў месенджары ці сацсетцы. «Наша задача — не дапусціць гэтага», — дадаў міністр інфармацыі і пачаў тлумачыць моладзі значэнне адказнасці ў працы сучаснага журналіста.

Уладзімір Перцоў заклікаў маладых журналістаў праўладных СМІ не паддавацца, на хітрыкі тых, хто, паводле яго слоў,  знаходзіцца па той бок інфармацыйных барыкад, і напрацоўваць уменне ствараць кантэнт у новых лічбавых асяроддзях з прымяненнем сучасных інфармацыйных інструментаў.

Падчас форуму сваім бачаннем на сучасны этап развіцця праўладнай  беларускай журналістыкі з маладымі журналістамі таксама падзяліліся старшыня праўлення ЗАТ «Другі нацыянальны тэлеканал» Марат Маркаў, шэф-рэдактар дырэкцыі трансмедыйных праектаў МТРК «Мір» Таццяна Нікіціна і прапагандыст Рыгор Азаронак.

Чытайце яшчэ:

Дзяржаўная газета з Пінска заклікае чытачоў збіраць падарункі для дзяцей Данбаса

Як дзве дзяржаўныя газеты ў трох артыкулах абвяргалі адзін «экстрэмісцкі» паблік

Супраць былых супрацоўнікаў светлагорскай ТРК «Ранак» распачалі крымінальную справу за стварэнне экстрэмісцкага фармавання. Каментар юрыста