КДБ: Павел Шаройка прызнаў, што з’яўляецца супрацоўнікам кадравага апарату выведкі Украіны

Пасада Шаройкі як карэспандэнта «Ўкраінскага радыё» была «для прыкрыцьця», сьцьвярджае КДБ. Паводле КДБ, атрыманыя «пераканаўчыя доказы» яго незаконнай дзейнасьці, а сам Шаройка прызнаў, што працаваў выведнікам:

«У Беларусі Паўло Шаройка стварыў агентурную сетку зь ліку грамадзянаў Рэспублікі Беларусь, якія за грашовую ўзнагароду выконвалі ягонае заданьне збору зьвестак выведнага характару ў вайскова-палітычнай сфэры».

Падчас ператрусу ў Шаройкі, паводле КДБ, знайшлі копіі выведніцкіх данясеньняў, а каардынаваў ягоную працу супрацоўнік Галоўнага ўпраўленьня выведкі Ігар Скварцоў, які дзейнічаў як супрацоўнік амбасады. Скварцова абвясьцілі «пэрсонай нон-грата».

Супраць Шаройкі завялі крымінальную справу за шпіянаж (арт. 358 КК), ён узяты пад варту. За гэта пагражае ад 7 да 15 гадоў пазбаўленьня волі.

Шаройку затрымалі 25 кастрычніка, трымаюць у адзіночнай камэры СІЗА КДБ, у яго ёсьць выдзелены дзяржавай адвакат, для яго прымаюць перадачы, а сам ён дасылае лісты з «амэрыканкі». Жонка Шаройкі Алена вярнулася ў Менск, каб арганізаваць юрыдычную абарону журналіста.

Таксама затрыманы грамадзянін Беларусі — «дзяржаўная здрада»

Паводле КДБ, пры зборы сакрэтных матэрыялаў быў затрыманы таксама грамадзянін Беларусі, які «ажыцьцяўляў шпіёнскую дзейнасьць у інтарэсах Украіны», ён сваю віну прызнаў і паведаміў, што на заданьне ўкраінскай выведкі за грошы зьбіраў і перадаваў зьвесткі пра абароназдольнасьць Беларусі.

Супраць беларуса распачалі крымінальную справу за «дзяржаўную здраду» (арт. 356 КК). За гэта таксама пагражае ад 7 да 15 гадоў пазбаўленьня волі.

Мінабароны Ўкраіны: інфармацыя не адпавядае рэчаіснасьці

У Міністэрстве абароны Ўкраіны абвяргаюць інфармацыю КДБ аб тым, што затрыманы карэспандэнт пад прыкрыцьцём журналісцкай дзейнасьці працаваў на нацыянальныя органы выведкі:

«Сапраўды, Паўло Шаройка раней быў вайсковаслужбоўцам, але апошнім часам ён працаваў журналістам і да органаў выведкі не мае ніякага дачыненьня», — сказаў Свабодзе прадстаўнік Міністэрства абароны Ўкраіны.

Народны дэпутат Украіны, каардынатар групы «Інфармацыйны супраціў» Дзьмітры Тымчук раней заяўляў, што ўкраінскага журналіста Паўла Шаройку абвінавачваюць у Беларусі ў шпіянажы на падставе фальшывага дакумэнту.

Паводле яго, «дакумэнт вырабілі або ў ФСБ Расеі, або агентура ФСБ у КДБ Беларусі з мэтай арганізацыі апэрацыі для арышту ўкраінскага журналіста з абвінавачаньнямі ў шпіянажы, а ў далейшым — дыскрэдытацыі Беларусі ў дачыненьнях з ЭЗ і Ўкраінай і раскрутцы канфлікту паміж Беларусьсю і Ўкраінай».