ЕЗ заклікае Google і Facebook прасоўваць незалежныя беларускія медыі

Беларускія незалежныя журналісты паскардзіліся камісіі, што кантэнт з крытыкай рэжыму Аляксандра Лукашэнкі, не дасягае мэтавай аўдыторыі праз пошукавыя алгарытмы, якія выкарыстоўваюцца «Google», «Meta» і якія, паводле іх, неправамерна ўлічваюць лукашэнкаўскія правілы цэнзуры.

«Барацьба з дэзынфармацыяй і садзейнічанне свабодзе медыяў – гэта два бакі аднаго медалю, і мы хочам, каб буйныя тэхналагічныя кампаніі займаліся абодвума», – заявіла Finan­cial Times віцэ-прэзідэнтка Еўрапейскай камісіі Вера Юрава.

Паводле яе, «гэта азначае забеспячэнне бачнасці ў Інтэрнэце дакладнай інфармацыі, а не прапаганды Менску або Крамля». Таксама сітуацыя пагаршаецца тым, што Google News недасяжныя на беларускай мове, што абмяжоўвае тое, што чытачы краіны могуць знайсці ў інтэрнеце.

Юрава выказала сваю занепакоенасць наконт Беларусі ў снежні прэзідэнту Google у глабальных пытаннях Кенту Ўокеру. У траўні яна таксама абмяркоўвала аналагічныя пытанні з выканаўчым дырэктарам Google Сундарам Пічаі.

Разам з тым чыноўнікі ў Бруселі прызнаюць, што няма ніякіх падставаў штрафаваць ці ўзбуджаць судовыя справы супраць тэхналагічных кампаніяў за тое, што яны не дапамагаюць незалежным журналістам у барацьбе з аўтарытарным рэжымам.

У адказ Google заявіла, што прыкладае «усе намаганні, каб ствараць нашы прадукты і забяспечваць выкананне нашай палітыкі такім чынам, каб не прымаць да ўвагі палітычныя погляды».

У кампаніі адзначылі, што існуюць «сотні фактараў, якія вызначаюць, якія вынікі будуць паказаныя». Meta не адказала на запыт аб каментарах.

Юозас Алекас, еўрадэпутат з Літвы, заявіў, што пакуль «буйныя тэхналагічныя кампаніі не праявілі ніякай гатовасці або цікавасці да развязання гэтай праблемы». Паводле яго, забароненыя медыі разглядаюцца алгарытмамі Google як «непрацоўная спасылка» і паніжаюцца ў выніках пошуку ў Беларусі, што з’яўляецца прыкладам таго, як тэхналагічныя кампаніі ненаўмысна дапамагаюць Лукашэнку. У выніку «ў галоўных навінах дамінуюць медыі Лукашэнкі і расейскія медыяканалы».

Пытанне распаўсюду інфармацыі ў камунікаванні са згаданымі кампаніямі рэгулярна ўздымалі і беларускія дэмакратычныя сілы. Гэтак, у чэрвені 2022 года адзначалася, што Офіс Святланы Ціханоўскай праводзіць сустрэчы з прадстаўнікамі тэхналагічных кампаніяў Microsoft, Google, Meta (Face­book, Insta­gram) і Tik­Tok.

18 лютага 2023 года Ціханоўская і прадстаўнікі Абʼяднанага пераходнага кабінету сустрэліся з віцэ-прэзідэнткай YouTube у справе сувязяў з урадамі Лэслі Мілер і віцэ-прэзідэнткай Google у справе публічнай палітыкі і сувязяў з урадамі ў Еўропе Анэтэ Крэбэр-Рыль. Падчас сустрэчы абраная прэзідэнтка ўздымала пытанні, якія дапамогуць развязаць праблему беларускай мовы ў прадуктах Google і YouTube, спыніць злоўжыванне рэкламнымі інструментамі з боку расейскіх і лукашэнкаўскіх прапагандыстаў, забяспечыць доступ да сайтаў і каналаў незалежных медыяў, прызнаных рэжымам Лукашэнкі экстрэмісцкімі, праз пошукавыя сістэмы і іншыя інструменты Google.

Таксама і ў лістападзе Ціханоўская наведала рэгіянальны офіс YouTube у Берліне, дзе сустрэлася з кіраўніцай платформы, адказнай за сувязі з урадамі, Забінэ Франк. На сустрэчы абмеркавалі падтрыманне беларускай мовы на платформе, прасоўванне беларускага кантэнту і блакаванне рэжымнай прапаганды.

Чытайце яшчэ:

Симпатизируют России, находятся под санкциями. Посмотрели, кто из провластных медийщиков идет на парламентские и местные выборы

Святлана Ціханоўская ўзнагародзіла «Белсат» Знакам гонару дэмакратычных сілаў

Дзяржаўныя выданні Брэсцкай вобласці абавязалі завесці чат-бот у Telegram