Ці з’яўляюцца агляды блогераў рэкламай? Адказ МАРГ
Міністэрства антыманапольнага рэгулявання і гандлю Беларусі тлумачыць, ці адносяцца да рэкламы агляды, якія размяшчаюцца блогерамі ў інтэрнэце, пра ўстановы і тавары.
![блогеры змены ў законе аб ракламе](https://khdbz39sm.shop/wp-content/uploads/2024/07/blogery-jpg-webp.webp)
Фота: trendhero.io
Інфармацыйныя матэрыялы, напрыклад, агляды блогераў пра дзейнасць арганізацый маюць асобныя прыкметы рэкламы. У тым ліку назву арганізацыі ці ўстановы, выявы вытворчых аб’ектаў, аб’ектаў гандлю і абслугоўвання, дэманстрацыя вытворчасці тавараў і г. д.
«У выпадку калі такія інфармацыйныя матэрыялы падрыхтаваныя з мэтай асвятлення дзейнасці розных арганізацый па ініцыятыве блогера, з’яўляюцца асноўнай тэматыкай блога, бачыцца адсутнасць адной з прыкмет рэкламы (накіраванасць на прыцягненне ўвагі да аб’екта рэкламавання, фарміраванне або падтрымліванне цікавасці да яго і (або) яго прасоўванне на рынку). На гэтыя інфармацыйныя матэрыялы не будуць распаўсюджвацца патрабаванні закона «Аб рэкламе» і іншыя нормы заканадаўства аб рэкламе», — паведамілі ў МАРГ.
Пры гэтым ведамства пералічыла крытэры нерэкламных матэрыялаў.
У іх мусіць адсутнічаць кантактная інфармацыя, напрыклад, адрасы і нумары тэлефонаў, адрасы сайтаў і акаўнтаў у сацыяльных сетках, спасылкі на іх. Яны не павінны быць пра адзін і той жа аб’ект рэкламавання.
МАРГ нагадвае, што на інфармацыю, якая не падпадае пад вызначэнне рэкламы, дзеянне закона «Аб рэкламе» не распаўсюджваецца. І ў такім выпадку падаваць звесткі на занясенне ў рэестр рэкламараспаўсюднікаў не трэба.
А ў выпадку адпаведнасці крытэрам вызначэння «рэклама» агляд павінен адпавядаць патрабаванням заканадаўства. Неабходна атрымліваць згоду на выкарыстанне найменняў арганізацый, таварных знакаў і (або) знакаў абслугоўвання, эмблем і іншай сімволікі, выявы маёмасці арганізацый або грамадзян.
Акрамя таго Міністэрства антыманапольнага рэгулявання і гандлю зазначае, што аказанне паслуг па размяшчэнні рэкламы ажыццяўляецца абавязкова на падставе дамовы, якая змяшчае кошт паслуг або ўмовы вызначэння такога кошту.
Калі фізічная асоба аказвае паслугі па размяшчэнні рэкламы ў інтэрнэце іншым асобам, такі суб’ект з’яўляецца рэкламараспаўсюднікам, які падлягае ўключэнню ў рэестр. Аказанне такіх паслуг без уключэння ў рэестр з’яўляецца незаконным і забараняецца, — падсумоўвае ведамства.
![](https://khdbz39sm.shop/wp-content/themes/baj/assets/images/telegram-logo.jpg)