Блогера Андрэя Павука міліцыя вывела з Акцябрскага райвыканкама пад рукі з прыгнутай галавой

Блогер з мясцовай пенсіянеркай Аленай Навічонак чакалі старшыню Гомельскага аблвыканкама Уладзіміра Дворніка, які прыехаў у Акцябрскі па нейкіх службовых справах. У іх былі асабістыя пытанні, якія не вырашылі мясцовыя чыноўнікі, і патрабавалася ўмяшальніцтва абласнога кіраўніка.

Лейтэнант міліцыі загадваў блогеру спыніць здымкі, а яшчэ прад’явіць пашпарт, каб пацвердзіць асобу. Ніякіх іншых дакументаў міліцыянт не прызнаваў.

Андрэй Павук прасіў патлумачыць, на якой падставе забараняецца весці відэаздымкі ў вестыбюлі раённай адміністрацыі.

— Гэта не грамадскае месца, гэта орган улады, аб’ект пад аховай. Нашай унутранай інструкцыяй забароненыя відэаздымкі, — заяўляў афіцэр міліцыі, які не назваў свайго прозвішча, а толькі паказваў на свой нагрудны знак з нумарам №71432.

— Вы парушаеце Канстытуцыю Рэспублікі Беларусь — органы ўлады працуюць адкрыта, галосна, — у сваю чаргу тлумачыў блогер міліцыянту.

Пенсіянерка Навічонак абуралася: “Усюды перад намі закрываюць дзверы. А я тут вырасла, працавала, інваліднасць атрымала. Няхай бы Дворнік да нас прыслухаўся”.

Лейтэнант распарадзіўся, каб дзяжурны міліцыянт выклікаў нарад міліцыі.

Прыехалі яшчэ трое міліцыянтаў Светлагорскага аддзела дэпартамента аховы МУС, старшы з іх Сяргей Дацко. (Аддзел гэты абслугоўвае і Акцябрскі раён.)

Блогера Павука ўзялі пад рукі, прыгнулі галаву і вывелі з будынка райвыканкама.

Даставілі Павука ў Акцябрскі РАУС, як было заяўлена, з прычыны непадпарадкавання законным патрабаванням супрацоўніка міліцыі і высвятлення асобы.

— Трымалі мяне ў райаддзеле міліцыі гадзіну. Прынеслі ксеракопію пашпарта, пыталіся, ці сапраўды адпавядае яна майму пашпарту. Адпусцілі, калі Уладзімір Дворнік ужо з’ехаў. Пратакол пры мне не складалі, — паведаміў службе маніторынгу ГА “БАЖ” Андрэй Павук.

Блогер Павук з’яўляецца заснавальнікам у сацыяльных сетках папулярнай суполкі “Рудабельская паказуха”, ён здымае відэасюжэты пра мясцовае жыццё, у якіх часта дастаецца і мясцовым чыноўнікам.

Андрэй Павук: Калі спяваў у вёсцы, думаў, што кіёчкам па галаве ляснуць. Але не — пахвалілі