Блогер Віталь Усціновіч правёў 25 сутак у ІЧУ за распаўсюд «экстрэмісцкіх матэрыялаў»

Віцебскі блогер Віталь Усціновіч адбыў 25 сутак арышту за распаўсюд «экстрэмісцкіх матэрыялаў» (артыкул 19.11 Адміністрацыйнага кодэкса). Пра гэта ён распавёў на «пакаяльным відэа», якое апублікавалі праўладныя тэлеграм-каналы, паведамляе «Вясна».

Фота: скрын відэа з канала Віталя Усціновіча

На відэа мужчына гаворыць, што яго затрымалі месяц таму. І дадае, што супрацоўнікі ГУБАЗіК «паводзілі сябе карэктна», а на «сутках» яго не білі. Арышт Усціновіч адбываў у ІЧУ Віцебска.

Ролік праўладнага канала змантаваны так, што спачатку Усціновіча паказваюць на фоне плакатаў супраць «экстрэмізму», потым — камеры ў ізалятары, а ў канцы — на фоне надпісу «Дзякуй вам, хлопцы», адзначае «Медиазона. Беларусь».

Паведаміў, што ідзе ў суд, і знік

Нагадаем, першапачаткова на Усціновіча склалі пратакол за правядзенне «несанкцыянаванага масавага мерапрыемства» (артыкул 24.23 Адміністрацыйнага кодэкса), бо на старых відэа знайшлі аватарку з бел-чырвона-белым сцягам. Тады відэаблогер суткі правёў у ІЧУ, а потым яго адпусцілі з позвай у суд.

Ідучы на адміністрацыйны працэс, Віталь Усціновіч паабяцаў сваім падпісчыкам, што абавязкова распавядзе працяг гісторыі. Аднак відэаролік пра гэта не выйшаў, замест гэтага праз некаторы час з’явілася відэа, дзе блогер казаў, што пакідаў каментары на «забароненых» сайтах і здымаў відэаролікі «пра Шоўшэнку». Меркавана, ролік выклалі самі сілавікі.

«Дзед Шоўшэнка» — гэта персанаж з вусамі і сіпатым голасам, які прэтэндуе на тое, што лепей за ўсіх разбіраецца ў палітыцы, эканоміцы, культуры і ўвогуле ва ўсіх сферах жыцця. У ролі «дзеда Шоўшэнкі» выступаў сам відэаблогер. А яшчэ ён запачаткаваў гумарыстычную серыю «Ябатькины новости», дзе выкарыстоўваў фрагменты відэа з Ярмошынай, Азаронкам і іншымі пазнавальнымі асобамі.

Але ўсё гэта Віталь Усціновіч рабіў да сакавіка 2022 года. У той час яго затрымалі, канфіскавалі аргтэхніку, і ён публічна паведаміў сваім гледачам, што больш «не чапае жыццё краіны», а відэаролікі будзе здымаць выключна пра рыбалку, падарожжы па закінутых вёсках і дэгустацыю прадуктаў.

Ад гэтага правіла ён не адступаў, хоць вострыя каментары ў ягоных відэароліках трапляліся. Прыкладам, здымаючы закінутыя дзіцячыя лагеры ці разбураныя хаты ў нежылых вёсках, ён неаднаразова падкрэсліваў, што «гэта адбываецца ў нашай стабільнай квітнеючай краіне».