Блогер Vadimati ў жніўні мадэраваў мітынг уладаў і пратэстоўцаў, а цяпер аштрафаваны на 20 базавых

Падтрымаць блогера ў залу суда прыйшлі амаль 30 чалавек рознага ўзросту, большасць з якіх з’яўляюцца прыхільнікамі яго творчасці. Vadi­mati (Вадзім Ярмашук) мае каля 30 тысяч падпісчыкаў у Insta­gram.

Вадзіма Ярмашука 27 кастрычніка судзілі паводле ч. 1 арт. 23.34 КаАП — за парушэнне парадку арганізацыі або правядзення масавых мерапрыемстваў.

Варта нагадаць, што ў жніўні 2020 года Vadi­mati па запрашэнні гарвыканкама мадэраваў выступы пратэстоўцаў і прадстаўнікоў улады ў цэнтры Гродна, вёў стрымы з акцый, таксама ў сваім Insta­gram выказваўся супраць гвалту.

Паводле слоў блогера, ноч перад судом ён не спаў, бо рыхтаваўся да судовага працэсу (Вадзім мае юрыдычную адукацыію), падчас слухання справы ён спрабаваў прывесці доказы сваёй невінаватасці:

— Я вывучыў складзены на мяне пратакол і знайшоў вялікую колькасць памылак, якія зрабіў міліцыянт Андрэй Талочка, — кажа Вадзім Ярмашук. — Але суддзя, пасля таго як выслухаў мой выступ, зрабіў перапынак і, апусціўшы вочы, даў мне 20 базавых штрафу.

Адміністрацыйны пратакол у дачыненні Вадзіма Ярмашука быў выпісаны за ўдзел у вулічнай акцыі 30 жніўня, калі некалькі тысяч гарадзенцаў прайшліся маршам ад спартовага комплекса “Нёман” да псіханеўралагічнага дыспансера, каб павіншаваць Аляксандра Лукашэнку з днём народзінаў. Блогер не меў з таго часу затрыманняў, супрацоўнікі міліцыі «вылічылі» яго па фота і відэа.