Беларускае назалежнае кіно ва Украіне: стартуе фестываль «1084. На мяжы»
6 лістапада 2023
З 9 лістапада 2023 года ва Украіне пачнецца фестываль дакументальнага кіно «1084. На мяжы». Цягам трох месяцаў у пяці гарадах пройдуць афлайн-паказы беларускіх дакументальных стужак, а таксама іншыя культурныя мерапрыемствы. Падчас аднаго з іх прагучаць песні на вершы палітзняволенага медыяменеджэра Андрэя Аляксандрава.
«1084. На мяжы» — ужо другі фестываль ва Украіне, які ініцыяваны беларускім асветніцка-сацыяльным грамадскім аб’яднаннем «Звяно». 1084 кіламетры — гэта працягласць агульнай мяжы суверэнных Беларусі і Украіны. Арганізатары спрабуюць задумацца пра будучыню стасункаў абедзвюх краін і абмеркаваць сучасную сітуацыю, адносіны простых людзей, а таксама падтрымку беларусамі ўкраінскага народа ў барацьбе з акупантамі і тэрорам.
Фестываль пройдзе ў пяці гарадах Украіны: Адэсе (з 9 па 11 лістапада), Луцку (з 18 па 20 лістапада), Бучы (18, 25–26 лістапада), Тэрнопалі (у снежні) і Кіеве (у студзені 2024 года).
У праграме фестывалю прадстаўленыя стужкі такіх незалежных беларускіх кінематаграфістаў, як Андрэй Куціла («Вадохрышча»), Вольга Прусак («Новае неба над новай краінай: прагулкі з Пушкіным»), Ганна Бадзяка і Аляксандр Міхалковіч («Motherland/Радзіма»), Аляксей Палуян («Кураж»), а таксама польскага рэжысёра Анджэя Фідыка («Беларускі вальс»). Пасля некаторых паказаў плануюцца сустрэчы з рэжысёрамі ў фармаце пытанні-адказы і абмеркаванні.
Акрамя таго, у межах фестывалю 11 лістапада ў Адэсе адбудзецца канцэрт украінскага гурта «Колір», які падтрымаў беларускіх палітвязняў.
Падчас выступлення музыкаў прагучаць песні па творах Рыгора Барадуліна і журналіста-палітвязня Андрэя Аляксандрава, які асуджаны беларускімі ўладамі на 14 гадоў зняволення.
З 18 па 25 лістапада ў Луцку распачнецца выстава антываенных плакатаў беларускага мастака і дызайнера Уладзіміра Цэслера, частка прац пад назвай Hitlerkaputin прысвечана беларускай рэчаіснасці і тэме поўнамаштабнага ўварвання расеі ва Ўкраіну.
Уваход на ўсе мерапрыемствы па free donation – сабраныя сродкі будут пералічаны на закуп расходных матэрыялаў для VAC-тэрапіі ран ва ўкраінскіх ваенных і грамадзянскіх шпіталях.
Чытайце яшчэ:
У Львове беларусы і ўкраінцы выказалі салідарнасць са зняволенымі Лукашэнкам журналістамі
6 лістапада Марына Золатава адзначае Дзень народзінаў. Трэці год за кратамі
Инвазия пропаганды в Telegram и TikTok. Что кроется за тенденцией?
@bajmedia
У Брэсце прапагандысты абмяркоўвалі становішча ў медыясферы Беларусі
18.07.2024
Мінінфарм вынес папярэджанне рэдакцыі тэлепраграмы «8 канал»
02.08.2024
Міністр інфармацыі заявіў, што ў Беларусі абмежавалі доступ да 5 тысяч «экстрэмісцкіх» рэсурсаў
23.09.2024
Марыне Золатавай прысудзілі міжнародную прэмію Ёхана-Філіпа Палма
10.05.2024
