БАЖаўцы Магілёўшчыны правялі сход і абмеркавалі змены ў Кодэкс журналісцкай этыкі БАЖ

Традыцыйна сустрэча журналістаў адбылася ў гасцінных сценах грамадскага цэнтра “Кола” ў Магілёве. Нягледзячы на марознае надвор’е, на сход сабралася больш за два з паловай дзясяткі чалавек з Магілёва і рэгіёнаў вобласці.

На пачатку сходу перад бажаўцамі Магілёўшчыны выступіў старшыня камісіі па этыцы ГА “БАЖ” Анатоль Гуляеў. Ён падрабязна распавёў пра змены ў Кодэкс журналісцкай этыкі, якія прапануе камісія, звярнуў увагу на тое, чым выкліканая неабходнасць іх прыняцця. Таксама Анатоль Арсеньевіч спыніўся на досведзе працы камісій па этыцы ў іншых еўрапейскіх краінах, прывёў канкрэтныя прыклады з дзейнасці камісій па этыцы БАЖу і іншых журналісцкіх арганізацый Еўропы.

Журналісты Магілёўшчыны актыўна ўключыліся ў працэс абмеркавання прапаноўваемых зменаў. Анатолю Гуляеву давялося адказваць на шматлікія пытанні прысутных на сустрэчы, тлумачыць сваю асабістую пазіцыю па большасці прапанаваных паправак у Кодэкс. Спадар Анатоль шмат гадоў адпрацаваў на Магілёўшчыне, ён карыстаецца павагай сярод мясцовых журналістаў, таму ўдзельнікі сустрэчы хацелі пачуць яго меркаванні наконт самых розных падзей.

Свае заўвагі і прапановы наконт зменаў у Кодэкс па этыцы выказалі рэдактар крычаўскай газеты “Вольны горад” Сяргей Няроўны, галоўны рэдактар інтэрнэт-сайта “Магілёўскі рэгіён” Зміцер Салаўёў, журналіст з Клімавіч Сяргей Аржанцаў, праваабаронца Барыс Бухель і іншыя.

Каардынатар Магілёўскай суполкі БАЖу Барыс Вырвіч нагадаў удзельнікам сустрэчы пра тое, што здолелі сумесна зрабіць мясцовыя бажаўцы ў 2016 годзе: удалося правесці цэлы шэраг разнастайных цікавых сустрэч, навучальных трэнінгаў і прэс-клубаў. У мерапрыемствах заўсёды ўдзельнічала шмат сябраў ГА “БАЖ” і зацікаўленых грамадскіх актывістаў з розных рэгіёнаў Магілёўшчыны.

Па меркаванні журналіста Уладзіміра Лапцэвіча, актывізацыі і больш хуткавага рэагавання на звароты сябраў арганізацыі патрабуе праца юрыдычнай службы ГА “БАЖ” на Магілёўшчыне. Пасля абмеркавання бажаўцы пагадзіліся, што юрыдычнай службе арганізацыі патрэбна сапраўды ўсё ж больш увагі надаваць канкрэтным зваротам журналістаў.

На сходзе былі зацверджаныя планы сумеснай дзейнасці сябраў ГА “БАЖ” Магілёўшчыны на 2017 год. Свае прапановы на гэты конт выказалі Барыс Вырвіч, Дзяніс Васількоў, Сяргей Няроўны, Яўген Глушкоў і іншыя бажаўцы.

Галоўны рэдактар інтэрнэт-сайта “Магілёўскі рэгіён” Зміцер Салаўёў распавёў прысутным на сходзе журналістам і грамадскім актывістам пра працу партала, заклікаў іх больш актыўна далучацца да яго дзейнасці.

Пасля сканчэння афіцыйнай часткі мерапрыемства бажаўцы Магілёўшчыны разам з запрошанымі гасцямі за кубачкамі кавы і гарбаты адзначылі надыход новага 2017 года і калядныя святы. Цікавы і крэатыўны музыкальны выступ перад калегамі зладзіла сям’я галоўнага рэдактара горацкай газеты “УзГорак” Галіны Буднай.

Бажаўцы Магілёўшчыны вызначыліся, што іх наступнае сумеснае мерапрыемства адбудзецца ўжо даволі хутка — у лютым 2017 года.