Аўтамабільны партал ABW абвясціў аб аднаўленні працы, але з іншымі заснавальнікамі

— У нашага партала мноства чытачоў і прыхільнікаў, сярод якіх знайшліся тыя, хто захацеў стаць новым уладальнікам ABW, — адзначаецца ў паведамленні. — Сёння ў abw.by новыя заснавальнікі, якія падхапілі эстафету 30-гадовай гісторыі газеты «Автобизнес» — самага аўтарытэтнага аўтамабільнага выдання Беларусі.

У адноўленай стужцы навінаў — звычайныя паведамленні пра міжнародныя падзеі, таксама сустракаюцца беларускія інфанагоды. Напрыклад, пра змены ў натарыяльным афармленні куплі-продажу аўтамабіляў ці пра пашырэнне спецыяльнасцяў у некаторых беларускіх універсітэтах, звязаных з распрацоўкай і эксплуатацыяй транспарта. Аўтаркай некаторых публікацыяў пазначана Марына Ажгірэй, якая доўгія гады працавала ў выданні.

— У нашых планах — актыўнае развіццё медыярэсурсаў і акаўнтаў ABW у сацыяльных сетках, — сцвярджае каманда партала. — Мы адкрытыя для вашых ідэй і прапаноў і гатовыя на старонках ABW даць слова знакамітым і маладым аўтаэкспертам, рэпарцёрам і журналістам, якім цікавая аўтамабільная тэматыка. Вядома, будуць і змены, якія, спадзяемся, ацэняць як нашы пастаянныя чытачы, так і новая аўдыторыя рэсурсу.

Раней, яшчэ да 2020 года, «Автобизнес» уздымаў вострыя і крытычныя для ўлады пытанні. У прыватнасці, асвятляў канфлікты паміж аўтаўладальнікамі і ДАІ, размяшчаў публікацыі з судовых працэсаў, крытыкаваў МУС. Як зменіцца рэдакцыйная палітыка цяпер, стане зразумела ў хуткім часе.

Нагадаем, ABW заявіў аб поўным спыненні працы 19 лістапада 2023 года. На сайце з’явіўся развітальны ліст ад рэдакцыі. Медыя падзякавала сваім чытачам за адданасць, падтрымку і крытыку, партнёрам — за давер і крэатыў, а калегам-канкурэнтам — за матывацыю да ўдасканалення.

Літаральна за месяц да гэтага сілавікі затрымалі дырэктара партала Віталя Палякова. Праўладныя Telegram-каналы апублікавалі відэа, на якім той прызнаваў, што ўдзельнічаў у акцыях пратэсту. А ў студзені 2023 года галоўную рэдактарку ABW Юлію Мудрэўскую асудзілі да 1,5 года калоніі паводле артыкула 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). У снежні 2022 года вырак вынеслі рэдактару спецпраектаў выдання Юрыю Гладчуку — яму прысудзілі 2,5 года калоніі.

Чытайце яшчэ:

«Простите за такой обидный и непредсказуемый финал». Белорусских медиа остается все меньше. Посмотрели, какие из них закрылись в 2023 году

«Вместо эпилога». ABW.by в прощальном письме благодарит читателей, партнеров и конкурентов

«Подошли к тому моменту, когда готовы прекратить работу сайта ABW.BY». Учредители автопортала выступили с громким заявлением