Асуджанага блогера Аляксандра Ігнацюка ўнеслі ў спіс «экстрэмістаў»

Блогера і былога журналіста Аляксандра Ігнацюка МУС Беларусі ўнёс у пералік грамадзян, «датычных да экстрэмісцкай дзейнасці». Імя блогера 7 чэрвеня з’явілася ў папоўненым спісе, які вядзе на сваім сайце сілавое ведамства.

Блогер Аляксандр Ігнацюк. Фота: з уласнага архіва

Сёлета 5 красавіка суд Столінскага раёна прызнаў Аляксандра Ігнацюка  вінаватым паводле трох артыкулаў Крымінальнага кодэкса:

- арганізацыя акцый пратэстаў у Століне і Мінску (частка 1 артыкула 342 КК),

- паклёп на Аляксандра Лукашэнку (частка 2 артыкула 367 КК),

- вымагальніцтва (частка 2 артыкула 208 КК).

Суддзя Столінскага раённага суда Сяргей Насеня асудзіў Ігнацюка да 6 гадоў пазбаўлення волі з адбыццём у папраўчай калоніі ва ўмовах узмоцненага рэжыму і да штрафу памерам 200 базавых велічыняў (8000 BYN). Таксама суддзя пастанавіў спагнаць з блогера на карысць нібыта пацярпелага ад ягонага вымагальніцтва прадпрымальніка маёмасны ўрон у памеры 1800 рублёў. І канфіскаваў на карысць дзяржавы ноўтбук — як «сродак здзяйснення злачынства».

Аляксандр Ігнацюк абскардзіў рашэнне Столінскага райсуда ў вышэйшую судоваю інстанцыю. 28 траўня Брэсцкі абласны суд разгледзеў яго апеляцыйную скаргу. Слуханне адбылося ў закрытым рэжыме. Суддзя Брэсцкага абласнога суда Мікалай Сянько пастанавіў пакінуць прысуд у сіле.

Відэаблогера Аляксандра Ігнацюка затрымалі 18 ліпеня 2023 года. Пра гэта стала вядома выпадкова: ён даўно жыў адзін у аддаленай вёсцы Пінскага раёна, і сябры занепакоіліся пра ягоны лёс пасля таго, як ён цягам некалькіх тыдняў не выходзіў на сувязь.

17 жніўня 2023 года беларуская праваабарончая супольнасць прызнала Ігнацюка палітычным вязнем.

Падрабязнасці пра абвінавачанні, высунутыя супраць блогера, сталі вядомыя толькі сёлета 11 сакавіка з паведамлення на афіцыйным тэлеграм-канале Міністэрства ўнутраных спраў Беларусі. Там сцвярджалася, што Аляксандр Ігнацюк нібыта садзейнічаў «экстрэмісцкаму» тэлеграм-каналу, адміністратары якога знаходзяцца за мяжой, «сістэматычна імкнуўся дыскрэдытаваць дзяржаўныя органы» і «спрабаваў уладкавацца на працу ў экстрэмісцкія інтэрнэт-крыніцы».

Таксама МУС заявіла, што блогер вырабляў відэаролікі з «кампраматам» на мясцовых прадпрымальнікаў і вымагаў з іх грошы, пагражаючы апублікаваць гэтыя факты ў інтэрнэце. І што нібыта ад дзейнасці блогера пацярпелі трое жыхароў Столінскага раёна.