Арганізатары Hrodna Media Weekend: “Рэагуем на актуальныя патрэбы медыйшчыкаў”

Два інтэнсіўныя дні майстар-класаў, дыскусій, прэзентацый, удзельнікі з розных куткоў краіны, спікеры з багатым прафесійным даробкам. Грамадскае аб’яднанне “Цэнтр “Трэці Сектар” падрыхтавала праграму на самыя апошнія запатрабаванні журналістаў і актывістаў, якія вядуць свае інфапраекты.

“Яшчэ ўлетку зрабілі апытанку — якія ёсць патрэбы ў ведах у сферы медыя, — расказала сябра ГА “Цэнтр “Трэці Сектар” Ганна Барадзіна. — У выніку для нас сталі відавочнымі тэмы “кіраванне людзьмі”, “кіраванне грашыма”, “прасоўванне ў інтэрнэце”.

Каб запоўніць гэты прабел, арганізатары запрасілі ў Гродна найбольш цікавых экспертаў з Беларусі. Выключэннем стаў толькі Дзмітрый Сурнін з Масквы з тэмай “Рэдагаванне без кампрамісаў. Як працаваць (і не працаваць) з тэкстамі”.

Добра вядомыя беларускай журналісцкай супольнасці медыя-трэнеры Міхаіл Дарашэвіч і Паўлюк Быкоўскі расказалі пра вобраз інтэрнэт-аўдыторыі, вывучэнне яе паводзінаў і будаванне стратэгіі прасоўвання кантэнту ў сацыяльных сетках. Крэатыўны дырэктар Talaka.by Іван Вядзенін распавёў, як сабраць грошы на медыяпраект праз краўндфандынг.

“Як выкарыстоўваць мультымедыйныя матэрыялы для прасоўвання вашых ідэяў” — майстар-клас ад галоўнага рэдактара платформы, што прасоўвае рэформы ў Беларусі, IdeaBy.org Рыгора Астапені. Рэдактары CityDog.by Яся Каралевіч-Картэль і Сяргей Сахараў падзяліліся сакрэтамі свайго досведу ў натыўнай рэкламе.

“Я наведала майстар-класы Дзмітрыя Сурніна і “Сіцідога”. Дзмітрый казаў знаёмыя рэчы, толькі яны былі цудоўна структураваныя. Я назвала б гэта падыходам матэматыка ці фізіка да рэдактарскай працы. Ён казаў пра важную для любога рэдактара задачу: як пабудаваць работу так, каб ад пастаноўкі задачы да выніковага артыкула журналіст прыйшоў самым кароткім шляхам. Шмат карыснага мы абмеркавалі пад час нефармальнай гутаркі. Мы даўно прыглядаемся да досведу “Сіцідога”, а тут з’явілася магчымасць жывых зносінаў. А гэта нашмат больш вынікова”, — падзялілася ўражаннямі адна з удзельніц, намесніца рэдактара газеты “Вячэрні Гродна” Іна Грышук.

У канцы ўікенда агульнае фота на памяць да наступнай сустрэчы медыямэнаджэраў. Падчас закрыцця арганізатары анансавалі Форум у Мінску, медыябранчы,  дыстанцыйную школу, Medi­aL­ab у Львове. Сачыце за абвесткамі!

Фота аўтара

Запрашаем на вялікую презентацыю маніторынгу асвятлення парламенцкіх выбараў у СМІ. Серада, 11.00, офіс БАЖ!