Мадона, янот і Анджэліна Джалі: заходнія агенцтвы кажуць, што БелТА бярэ здымкі без дазволу

У кампаніі Get­ty Images нам паведамілі, што дамовы зь БелТА на выкарыстаньне фотаздымкаў яны ня маюць. Супрацоўнікі Маскоўскага офісу кампаніі, які займаецца беларускімі кліентамі, кажуць, што яшчэ на мінулым тыдні зьвязаліся зь БелТА праз электронную пошту наконт выкарыстаньня сваіх фота, але адказу дагэтуль не атрымалі.

Кіраўнік маскоўскага прадстаўніцтва Get­ty Images Дзьмітры Апашнянскі патлумачыў Радыё Свабода, што на постсавецкай прасторы даволі складана дабіцца адэкватнай кампэнсацыі за незаконнае выкарыстаньне фотаздымкаў. Ён прывёў у прыклад судовы працэс, які Get­ty Images нядаўна вяла супраць расейскай радыёстанцыі Спорт FM.

«Мы атрымалі за здымак 25 тысяч [расейскіх] рублёў кампэнсацыі [цяпер гэта прыблізна 750 беларускіх]. Але наш юрыст займаўся гэтым паўгода. Нам гэта нявыгадна».

Мы таксама атрымалі адказ з брытанскага агенцтва Press Asso­ci­a­tion, чый фотаздымак рэжысэра Джэймса Гана ў кампаніі зь янотам ёсьць на сайце БелТА.

«На жаль, выглядае, што ў нас няма дамовы зь БелТА».

У аўторак і сераду мы спрабавалі атрымаць у прадстаўнікоў агенцтва БелТА камэнтар пра гэтую сытуацыю. Аднак тыя адказныя асобы, да якіх нас пераадрасоўвалі, казалі, што ня ведаюць, ці мае БелТА дазвол на выкарыстаньне здымкаў Press Asso­ci­a­tion і Get­ty Images