Аляксандр Алесін па-ранейшаму застаецца абвінавачаным

Вядомы беларускі журналіст Аляксандр Алесін па-ранейшаму застаецца ў статусе абвінавачанага па крымінальнай справе аб супрацоўніцтве з замежнымі спецслужбамі, заведзенай КДБ Беларусі ў снежні мінулага года.

– Следчых дзеянняў з маім удзелам ужо даўно не праводзіцца. Я спадзяваўся, што ў святле нядаўняга вызвалення палітвязняў абвінавачанні з мяне здымуць, бо з‑за падпіскі аб нявыездзе я вымушаны адмаўляцца ад вялікай колькасці важных міжнародных сустрэч. Але следчыя раяць мне чакаць указа Лукашэнкі.

У КДБ гавораць, што Палата прадстаўнікоў падрыхтавала папраўкі ў Крымінальны кодэкс, паводле якіх супрацоўніцтва з замежнымі спецслужбамі, якое не прычыніла шкоды дзяржаве, не будзе з’яўляцца злачынствам. Калі папраўкі будуць падпісаныя Лукашэнкам, следчыя абяцаюць закрыць справу, – расказаў Аляксандр Алесін прэс-службе ГА “Беларуская асацыяцыя журналістаў”.

Нагадаем:

Вайсковага эксперта, аглядальніка штотыднёвіка «Белорусы и рынок» Аляксандра Алесіна затрымалі беларускія спецслужбы 25 лістапада. Пра гэта стала вядома толькі на пачатку снежня, але ні прычын затрымання, ні месцазнаходжання журналіста КДБ не паведамляла. Пазней высветлілася, што яго ўтрымліваюць у следчым ізалятары КДБ.

8 снежня сваякі Алесіна паведамілі, што яму выстаўлена абвінавачанне ў здрадзе дзяржаве (артыкул 356 Крымінальнага кодэкса) і ўсталяванні супрацоўніцтва са спецыяльнай службай органаў бяспекі або выведвальным органам замежнай дзяржавы (артыкул 356–1).

10 снежня Алесіна вызвалілі пад падпіску аб нявыездзе. Журналіст паведаміў калегам, што абвінавачанне ў здрадзе дзяржаве з яго знялі і цяпер абвінавачваюць толькі ў супрацы з замежнай спецслужбай.