34 хвіліны ў прайм-тайм: як Лукашэнка (не) карыстаецца ТБ-эфірам для агітацыі
30 ліпеня 2020
28 ліпеня альтэрнатыўныя кандыдаты ў прэзідэнты Беларусі другі (і апошні) раз выступілі са сваімі зваротамі па дзяржаўным тэлебачанні. У кожнага быў ліміт выступу ў паўгадзіны, аднак ніхто не скарыстаўся гэтым часам напоўницу. Даўжэй за ўсё на экране бліскала і піла вадзічку Ганна Канапацкая — 24 хвіліны 30 секунд, а самым хуткім аказаўся Сяргей Чэрачань —16 хвілін 30 секунд. Святлана Ціханоўская і Андрэй Дзмітрыеў справіліся за 22 і 24 хвіліны адпаведна.
Выбарчы кодэкс прадпісвае СМІ даваць аднолькавы эфірны час усім кандыдатам у прэзідэнты. Але ў тэлевізійным парадзе кандыдатаў ні першы, ні другі раз не ўдзельнічаў Аляксандр Лукашэнка — ён ад агітацыйных эфіраў адмовіўся. Здавалася б, альтэрнатыўныя кандыдаты атрымалі перавагу… Але ці так гэта? Колькі хвілін яны правялі ў эфіры дзяржаўнага тэлебачання, вы ўжо ведаеце. А колькі хвілін было прысвечана кіраўніку Беларусі?
Не толькі “Беларусь 1”
Лукашэнку нішто не перашкаджае з’яўляцца на экране і без афіцыйнай агітацыі. Апошнім часам без яго абыходзіцца рэдкі навінавы выпуск на «Беларусь 1», АНТ і СТВ. Вывучым прайм-тайм беларускіх каналаў.
Выніковы выпуск праграмы «Нашы навіны» на канале АНТ выйшаў у 20:30. Першы ж сюжэт прысвечаны візіту Аляксандра Лукашэнкі ў частку 3214 унутраных войскаў МУС, дзе акрамя іншага прагучала ягоная заява аб тым, што ён бессімптомна перахварэў на каранавірус.
Працягласць — 10 хвілін 28 секунд.
Праграма «Панарама», якая выходзіць на «Беларусь 1» у 21:00, таксама пачынаецца з сюжэту пра тое, як кіраўнік дзяржавы наведвае сілавікоў. Працягласць — 12 хвілін 15 секунд.
На дапамогу тым, хто прапусціў папярэднія выпускі, у 22:30 прыходзіць тэлеканал СТВ. У 20-хвіліннай праграме «Навіны «24 гадзіны» Лукашэнку, вайсковай частцы 3214 і бессімптомнаму каранавірусу аддадзеныя 11 хвілін 21 секунда.
Разам — 34 хвіліны і 2 секунды. І гэта толькі ў вечаровы час! З’яўленне Лукашэнкі ў кароткіх дзённых выпусках навін на ўсіх трох ТБ-каналах мы не ўлічвалі.
На Youtube — без альтэрнатыўных кандыдатаў
Усе навінавыя выпускі мы паглядзелі на афіцыйных YouTube-каналах «Агульнанацыянальнага тэлебачання», «Агенцтва тэлевізійных навін» і «Сталічнага тэлебачання». А вось выступы альтэрнатыўных кандытатаў на канале АНТ, дзе публікуюцца выпускі навін «Беларусь 1», заліць чамусьці забыліся.
30 ліпеня кандыдаты ў прэзідэнты зноў трапяць на экраны дзяржаўнага тэлебачання. Увечары гэтага дня пройдуць іх тэледэбаты. Ад удзелу ў іх адмовіўся не толькі Аляксандр Лукашэнка, але і Ганна Канапацкая. Першы, як мы памятаем, агітацыяй не карыстаецца. А экс-дэпутатка Палаты прадстаўнікоў не бачыць сэнсу ўдзельнічаць у дэбатах без «адзінага моцнага саперніка».
@bajmedia
Юля Лейдзік і Жэня Канаплёў — пра тое, як ім удалося пракрасціся ўнутр Ціханоўскай
20.05.2024
«У нас уже нет надежды вытащить журналистов из тюрьмы». Редакторка Мейдан ТВ Севда Самедова – об Ильхаме Алиеве, давлении на журналистов и законах, убивающих медиа в Азербайджане
23.05.2024
Аляксандр Івулін: «Гісторыі, якія са мной адбываюцца, прымушаюць верыць у беларусаў»
10.01.2024
«Ці займалася я прапагандай? Не ведаю». Як журналістка пайшла з размеркавання з раёнкі
18.03.2024
