Сайт палітзняволенага журналіста Яўгена Меркіса перакупілі для казіно

Замест краязнаўчай старонкі зараз на дамене nashkraj.info адкрываецца анлайн-казіно з Казахстану, заўважыў «Штодзень».

nashkraj.info перакупілі для казіно

Раней па гэтым адрасе размяшчаўся «Краязнаўчы сайт Гомеля і Гомельшчыны», дзе было сабрана шмат унікальнай інфармацыі па краязнаўстве і гісторыі рэгіёна. Сайт перастаў працаваць у 2022 годзе, пасля арышту яго стваральніка — гомельскага журналіста Яўгена Меркіса. 

На nashkraj.info раней можна было прачытаць, напрыклад, пра кніжную культуру Веткі, грамадзянскую вайну 1648–1651 гадоў на Гомельшчыне, назвы посуду і начыння ў гаворках Лоеўшчыны і іншую інфармацыю.

Зараз старонку перакупілі і размясцілі на ёй агляд анлайн-казіно Казахстану. Мяркуючы па дадзеным сэрвиса web.archive.org, у новым выглядзе старонка працуе з вясны 2024 года.

Журналіст Яўген Меркіс быў затрыманы 13 верасня 2022 года. У 2023 годзе яго асудзілі на 4 гады пазбаўлення волі паводле часткі 1 і часткі 2 артыкула 361–4 КК (садзейнічанне экстрэмісцкай дзейнасці), а таксама па частцы 3 артыкула 361–1 КК (удзел у экстрэмісцкім фарміраванні). Праваабаронцы прызналі Яўгена Меркіса палітвязнем.