BYSOL адкрыў збор для журналісткі Валярыны Куставай

Беларуская актывістка і журналістка Валярына Кустава трапіла ў складаную жыццёвую сітуацыю і просіць пра дапамогу. Грошы патрэбныя, каб сплаціць пазыку на арэнду жытла і аплаціць юрыдычныя паслугі.

Валярына Кустава. Фота: са старонкі ў Face­book

На платформе BYSOL адкрыты збор сродкаў для дапамогі Валярыне, яе дачцы і бацькам.

Сума збору —  8700 еўра.

Валярына Кустава — паэтка, тэлевядоўца, ментарка, аўтарка медыйных праектаў. Яна стварыла праект «Беларус беларусу», з дапамогай якога распавядала пра рэпрэсіі і дапамагла больш як 120 сем’ям палітзняволеных і рэпрэсаваных. 

«Але зараз я і сама вымушаная звярнуцца па дапамогу, хоць гэта было вельмі няпростым рашэннем», — піша Валярына.

Праз супрацу з «Белсатам» і дапамогу людзям наша калега вымушана была ў 2021 годзе з’ехаць з Беларусі. Ёй удалося эвакуяваць маленькую дачку і бацькоў. Неўзабаве пасля пераезду ў бацькі Валярыны дыягнаставалі рак. Яму патрабуецца лячэнне і рэабілітацыя. Таксама праблемы са здароўем узніклі і ў самой Валярыны і яе дачкі. Гэта завяло сям’ю ў пазыкі.

«Сума, пра якую я прашу, не пакрые ўсе патрэбы і выклікі, якія з’явіліся ў маім жыцці, але вельмі дапаможа пачаць змаганне, і, вядома, я буду ўдзячная за кожнае магчымае ахвяраванне», — адзначае Валярына Кустава.