Старонку ў Facebook рэдактара «Витебский курьер NEWS» Аляксандра Корнышава прызналі «экстрэмісцкай»

Звесткі пра гэта з’явіліся ў абноўленым 30 верасня Рэспубліканскім спісе экстрэмісцкіх матэрыялаў, які складае Міністэрства інфармацыі Беларусі.

Аляксандр Корнышаў. Крыніца фота: bysol.org

Рашэнне аб прызнанні «экстрэмісцкай інфармацыйнай прадукцыяй» асабістай старонкі з назвай «Корнышев Александр» (ідэнтыфікатар  https://www.facebook.com/alex.iskander.74) прыняў 25 верасня суд Кастрычніцкага раёна Віцебска.

Паводле яе ўладальніка, гэта першая ягоная асабістая старонка ў сацыяльных сетках, на якую суд звярнуў увагу. Дагэтуль «экстрэмісцкай інфармацыйнай прадукцыяй» быў абвешчаны Telegram-канал «Витебский курьер NEWS», адбылося гэта яшчэ ў студзені 2022 года.

«Да іншых старонак пытанняў пакуль няма. У выпадку з Face­book, верагодна, нехта звярнуў увагу на застаўку з лагатыпам кааліцыі «Еўрапейскі выбар», у якую я ўваходжу», — мяркуе Аляксандр Корнышаў.

Сёлета 10 траўня кааліцыя «Еўрапейскі выбар» была абвешчана «экстрэмісцкім фармаваннем», і ў адпаведным спісе МУС таксама фігуруе прозвішча Аляксандра Корнышава.

Рэдактар і журналіст Аляксандр Корнышаў з лістапада 2020 года вымушана жыве ў замежжы. Ён абвешчаны ў міжнародны вышук на тэрыторыі Беларусі і Расіі. На радзіме, у Віцебску, па месцы ягонай рэгістрацыі неаднаразова праводзіліся ператрусы. Сёлета ў траўні Аляксандра Корнышава прызналі вінаватым у распаўсюдзе інфармацыйнай прадукцыі, уключанай у Рэспубліканскі спіс экстрэмісцкіх матэрыялаў. Ён быў аштрафаваны на 20 базавых велічынь (800 BYN) за рэпосты з Telegram-канала ўласнага выдання.