У Глыбокім падчас рэйду сілавікоў затрымалі адміністратара мясцовага пабліка

У Глыбокім на мінулым тыдні падчас так званай «зачысткі ад экстрэмістаў» супрацоўнікі віцебскага ГУБАЗіКа затрымалі прадпрымальніка Ігара Шкетава, якога называюць адміністратарам акаўнта «Подслушано Глубокое». 

Ігар Шкетаў. Фота: з асабістага архіва

Ігара Шкетава паказалі ў Telegram-канале сілавікоў у трэцяй частцы відэароліка, які міліцыянты прысвяцілі свайму рэйду на Глыбокае. У ім і фігуруе мужчына, які называе сябе адміністратарам Insta­gram-акаўнта podslushano_glybokoe.

Гэты паблік даволі папулярны ў глыбачан, на яго падпісана больш за тры тысячы чалавек.

Апошні раз у сацыяльных сетках Ігар Шкетаў быў 3 верасня. Вядома, што за распаўсюд «экстрэмісцкіх матэрыялаў» Шкетава судзілі таксама раней, 5 жніўня 2024 года. Вынік таго суда пакуль невядомы.

Нагадаем, на мінулым тыдні ў Глыбокім затрымалі не менш за 15 чалавек, гэта тых, каго праваабаронцам удалося верыфікаваць. Мясцовыя жыхары паведамляюць, што апошнім часам у горадзе затрымалі ад 60 да 100 чалавек. Некаторых судзілі ў Глыбокім і прызначылі адміністрацыйныя штрафы ці арышты, іншых адвозяць у Віцебск і заводзяць на іх крымінальныя справы.