Якія кадры шукаюць дзяржаўныя СМІ Брэстчыны і што там па заробках?

На інтэрнэт-партале дзяржаўнай службы занятасці з’явілася вакансія ад імя рэдакцыі раённай газеты «Івацэвіцкі веснік» і праграмы «Раённае радыёвяшчанне». Аб’ява выклікала цікавасць прапанаваным заробкам, які зараз рэдка калі знойдзеш у рэгіянальных дзяржаўных выданнях.

Фота: Vojtech Oken­ka для pexels.com

Дзяржаўная раёнка ў Івацэвічах прапануе працу карэспандэнту і гатовая плаціць яму 1200 рублёў штомесяц. Акрамя наяўнасці вышэйшай адукацыі іншыя ўмовы працаўладкавання не пазначаныя.

Калі прааналізаваць сайт дзяржаўнай службы занятасці, дык прапанова такога заробку для карэспандэнта газеты па-за межамі беларускай сталіцы — вялікая рэдкасць. На сёння больш прывабныя фінансавыя ўмовы для карэспандэнтаў размешчаныя толькі ад імя Белтэлерадыёкампаніі, тэлекампаніі «ВаенТБ», газет «Гродзенская праўда» і «Железнодорожник Белоруссии».

Якім яшчэ дзяржаўным СМІ Брэсцкай вобласці зараз патрэбны карэспандэнты і які заробак прапануюць?

З афіцыйнай базы вакансій можна даведацца, што рэдакцыя «Наша радыё» ў Баранавічах шукае на гэтую пасаду чалавека, які будзе атрымліваць 750–800 рублёў. Але да кандыдата ёсць дадатковыя патрабаванні, сярод якіх — «пісьменная гаворка, добрая дыкцыя, выдатная арыентацыя ў інфармацыйнай прасторы, навыкі напісання тэкстаў, ініцыятыўнасць, камунікабельнасць, адказнасць, аператыўнасць».

А вось рэдакцыі дзяржаўнай гарадской газеты «Брестский вестник» патрабуюцца фотакарэспандэнт, карэспандэнт і рэдактар ​​інтэрнэт-рэсурсу. На кожнай з пасадаў абяцаюць заробак у памеры ад 626 да 800 рублёў. Пры гэтым вышэйшая адукацыя неабавязковая.

Варта дадаць, што зараз у Беларусі 626 рублёў — гэта мінімальны афіцыйны заробак для тых, хто працуе на поўную стаўку. Паводле звестак Нацыянальнага статыстычнага камітэта, у Брэсцкай вобласці намінальная налічаная сярэдняя зарплата па выніках чэрвеня 2024 года складала 2014,5 рублёў.