«Белсат» паведаміў, што пераводзіць свой сайт на «мінімальны рэжым працы»

Сайт «Белсата» пераходзіць на «мінімальны рэжым працы». Пра гэта гаворыцца ў афіцыйным паведамленні тэлеканала.

Змены тлумачацца тэхнічнымі пытаннямі. Пра тэрміны абмежаванняў нічога не паведамляецца.

«Паважаныя чытачы! Праз шматлікія тэхнічныя праблемы сайт “Белсата” пераходзіць на мінімальны рэжым працы.

Мы спадзяемся, што ў хуткім часе рэдакцыі ўдасца вырашыць усе пытанні і вярнуцца ў звыклы для нас фармат выхаду матэрыялаў. Просім прабачэння за нязручнасці», — гаворыцца ў абвестцы.

Нагадаем, тэлеканал сутыкнуўся з праблемамі пасля таго, як новы польскі ўрад зладзіў рэарганізацыю грамадскіх СМІ, у тым ліку Польскага тэлебачання, да якога адносіўся «Белсат».

На мінулым тыдні польскі партал Onet паведаміў пра абвінавачанні ў бок менэджэраў «Белсата» — іх падазраюць у фінансавых махінацыях падчас заключэння дамоваў на IT-паслугі. 

У адказ кіраўніцтва «Белсата» выступіла з заявай, у якой выказала пратэст «супраць паклёпу».