Экстрэмісцкімі прызналі кнігі Паўла Севярынца, TikTok «Хартыя’97» і другі раз — старонку «Media IQ» у Facebook

Міністэрства інфармацыі Беларусі 24 чэрвеня абнавіла Рэспубліканскі спіс экстрэмісцкіх матэрыялаў, які складаецца паводле рашэнняў судоў. Робіцца гэта на запатрабаванне пракурорскіх работнікаў. І, падобна, іх дзеянні часам не ўзгадняюцца.

Фота: pexels.com

Прыкладам, 19 чэрвеня суд Лунінецкага раёна Брэсцкай вобласці прызнаў «экстрэмісцкай інфармацыйнай прадукцыяй» змест старонкі «Media IQ» у сацыяльнай сетцы Face­book. Перад гэтым, 13 чэрвеня, тое самае ўжо зрабіў суд Цэнтральнага раёна Гомеля. Такім чынам, гэтая старонка з адным і тым жа ідэнтыфікатарам facebook.com/mediaIQBelarus  двойчы трапіла ў «экстрэмісцкі спіс», які складае Мінінфарм.

Рашэннем суда Кастрычніцкага раёна Мінска ад 20 чэрвеня «экстрэмісцкімі» абвешчаны некалькі кніг палітвязня Паўла Севярынца. Гэта кнігі «Каменнае сэрца», «Люблю БЕЛАРУСЬ: 200 фэномэнаў нацыянальнай ідэі», «Беларусалім. Кніга другая. Сэрца сьвятла»,  выдадзеныя ў розныя гады, як у Беларусі, так і за яе межамі.

Гэтаксама 20 чэрвеня суд Вілейскага раёна Мінскай вобласці прызнаў «экстрэмісцкай інфармацыйнай прадукцыяй» Tik­Tok-акаўнт пад назвай «Хартыя’97» з ідэнтыфікатарам @charter97.org.

24 чэрвеня суд Полацка і Полацкага раёна прызнаў «экстрэмісцкай» старонку «Полоцк, Новополоцк – Новости Полотчины» ў  Face­book. Акаўнт з ідэнтыфікатарам facebook.com/groups/novopolotsk/ мае 8,4 тысячы падпісчыкаў. Тут размяшчаліся навіны пра мінулую прэзідэнцкую выбарчую кампанію, агульнабеларускі страйк, паведамленні пра стан мясцовых прадпрыемстваў. Але апошняя публікацыя на старонцы зробленая яшчэ ў 2021 годзе.