Футбольны Еўра-2024 па БТ паказваць не будуць
28 мая 2024
Намеснік старшыні АБФФ Андрэй Васілевіч паведаміў выданню «Смартпрэс», што Еўра-2024 не будзе транслявацца ў Беларусі.
Фота: Pixabay для pexels.com
— З гэтым пытаннем, напэўна, лепш звяртацца да адміністрацыі стадыёна «Дынама». Аднак ад сябе скажу наступнае. На сённяшні дзень, на вялікі жаль, ніводзін аператар пакуль не набыў права для транслявання матчаў чэмпіянату Еўропы на тэрыторыі Беларусі.
— Фактычна гэта азначае, што беларускія заўзятары чэмпіянат Еўропы не ўбачаць?
— Не ўбачаць па тэлевізары. Што ж, будзем глядзець яго так, як і глядзелі ды глядзім Лігу чэмпіёнаў — праз інтэрнэт-рэсурсы. Гэта афіцыйны сайт УЕФА і нейкія іншыя крыніцы, якія нашы заўзятары спрытна знаходзяць, — патлумачыў Васілевіч.
Чэмпіянат Еўропы па футболе мае прайсці з 14 чэрвеня па 14 ліпеня ў Германіі. Першапачаткова Белтэлерадыёкампанія разлічвала яго паказаць, напляваўшы на аўтарскія правы. Дзеля падобных выпадкаў у студзені 2023 года Савет Міністраў фактычна ўзаконіў у краіне пірацтва, дазволіўшы не прымяняць заканадаўства аб аўтарскіх правах у дачыненні да кантэнту, вырабленага «недружалюбнымі краінамі» і арганізацыямі, з імі звязанымі. У гэты спіс былі сярод іншых унесеныя ФІФА і УЕФА.
Але нядаўна стала вядома, што калі ўзаконенае пірацтва ў дачыненні да Еўра-2024 года адбудзецца, то Беларуская федэрацыя футбола і клубы, якія ўдзельнічаюць у еўракубках, могуць страціць фінансаванне ад УЕФА. А гэтыя даходы маюць і для клубаў, і для федэрацыі важнае значэнне, іх страта будзе вельмі балючай.
@bajmedia
Новы стары ньюсрум: куды і чаму пераехаў «Белсат»? Разбіраемся
28.05.2024
Былы вядучы БТ — пра закуліссе працы, расчараванні і дапамогу палітвязням
19.04.2024
«Пазыцыянавала сябе як жонку палітвязьня». Дар’я Лосік год за кратамі
18.10.2023
Выйшла кніга пра легендарныя беларускія музычныя медыя
24.11.2023
