Журналіст Ганімат Західаў супраць Азербайджана — ЕСПЧ вынес рашэнне па справе

Рашэнне па справе журналіста і рэдактара азербайджанскай незалежнай газеты «Азадлыг» Ганімата Західава Еўрапейскі суд па правах чалавека (ЕСПЧ) вынес 16 траўня гэтага года. Пераслед журналіста з боку рэжыму Аліева быў прызнаны незаконным, паведамляе расійская служба RFI.

Улётка ў падтрымку Ільхама Аліева перад прэзідэнцкімі выбарамі ў лютым 2024 года. Азербайджан, Баку. Фота: AP/ Sergei Grits

Акрамя таго, суд пастанавіў кампенсаваць Ганімату Західаву 1000 еўра выдаткаў на аплату адвакатаў.

«Шчыра кажучы, для мяне гэта нічога не азначае. Па-першае, вельмі позна [яно было прынята]. А, па-другое, рашэнні Еўрапейскага суда па правах чалавека ў Азербайджане не выконваюцца», — пракаментаваў RFI рашэнне суда журналіст.

Справа, па якой вялося разбіральніцтва ў Страсбургскім судзе, мела дачыненне да падзей 17-гадовай даўніны. Праблемы ў рэдакцыі газеты «Азадлыг» (у перакладзе з азербайджанскага «Свабода») пачаліся пасля публікацыі ў лютым 2007 года артыкула пра махінацыі ў міністэрстве абароны Азербайджана.

У лістападзе 2007 года Ганімата Західава арыштавалі па надуманых абвінавачаннях і прыгаварылі да чатырох гадоў пазбаўлення волі. Пасля памілавання прэзідэнтам у 2010‑м пераслед журналіста і яго сям’і працягнуўся.

У 2011 годзе Ганімат Західаў быў вымушаны эміграваць у Францыю, дзе выпускае праграму «Азербайджанскі час», якую транслюе спадарожнікавае тэлебачанне.

«У Азербайджане ўжо няма свабодных медыяў і свабоды слова. І гэта аднавіць магчыма ўжо толькі адным шляхам: калі змена ўлады будзе», — лічыць Ганімат Західаў.

Цяпер у Азербайджане працягваюцца рэпрэсіі ў дачыненні да журналістаў. Толькі за папярэднія шэсць месяцаў былі арыштаваны 10 прадстаўнікоў медыяў.