МУС прызнаў «экстрэмісцкім фарміраваннем» медыяпраект «Это Минск, детка»

Скрыншот сайта «Это Минск, детка»

Адпаведнае рашэнне прыняло 4 сакавіка 2024 года Міністэрства ўнутраных спраў Беларусі. І ў гэты ж дзень яно ўступіла ў законную сілу.

Паводле дзеючага беларускага заканадаўства, асобы, прызнаныя ўдзельнікамі экстрэмісцкага фарміравання, могуць быць прыцягнутыя да крымінальнай адказнасці па артыкулах «Стварэнне экстрэмісцкага фармавання альбо ўдзел у ім» (артыкул 361–1 Крымінальнага кодекса) ці  за «Садзейнічанне экстрэмісцкай дзейнасці» (артыкул 361–4 Крымінальнага кодэкса). Санкцыі гэтых артыкулаў прадугледжваюць да 10 гадоў пазбаўлення волі.

У «Пералік арганізацый, фарміраванняў, індывідуальных прадпрымальнікаў, датычных да экстрэмісцкай дзейнасці», які вядзецца на сайце МУС РБ, уключылі інтэрнэт-рэсурсы:

- Сайт «Это Минск, детка» —  www.thisminsk.org,

- Telegram-бот @thisminskbot (ID: 301029204),

- Insta­gram-акаўнт «Это Минск, детка | Гэта Менск, дзетка», размешчаны па адрасе instagram.com/thisminsk,

- старонку ў Threads «Это Минск, детка | Гэта Менск, дзетка», размешчаную па адрасе threads.net/@thisminsk,

- старонку ў «X» пад назвай «Гэта Менск, дзетка | Это Минск, детка», размешчаную па адрасе www.twitter.com/thisminsk,

- Face­book-акаўнт «Это Минск, детка» з адрасам www.facebook.com/ this­min­sk,

- старонку «ВКонтакте» пад назвай «Это Минск, детка»   (vk.com/public50426077),

- старонку ў «Одноклассниках» з назвай «Это Минск, детка» (ok.ru/thisminsk).

- Tik­Tok-акаўнт @thisminsk,

- YouTube-канал «Это Минск, детка» (youtube.com/@thisminsk).

Экстрэмісцкім прызнаны і лагатып медыяпраекта, апісаны ў дакуменце МУС як «выкананы на чорным фоне, у выглядзе абрэвіятуры «ЭМD» з упісанай літарай «М» у стылістычную выяву сімвала «геалакацыя».

У пераліку сярод інтэрнэт-рэсурсаў «Это Минск, детка» згадваюцца як датычныя да дзейнасці гэтага «экстрэмісцкага фарміравання» старонкі блогера Усяслава Пашкевіча. Ён вядомы чытачам і гледачам пад нікам «Тутэйшы Шляхціч».

У дакумент МУС уключаныя: Telegram-канал «Тутэйшы Шляхціч» з адрасам t.me/tutejsyja_bel, YouTube-канал «Тутэйшы Шляхціч» (youtube.com/@TutejszySzlachcicz), асабістыя старонкі

у  Insta­gram (instagram.com/usiaslau_paszkievicz), «ВКонтакте» (vk.com/lis.rokin), Twit­ter (twitter.com/Usiaslau_P).

У  інтэрв’ю «Радыё Свабода» Усяслаў Пашкевіч прызнаваўся, што да 2018 года не цікавіўся беларускай гісторыяй, не ведаў яе, але цяпер менавіта яна стала адным з галоўных ягоных захапленняў. Блогер, які пасля вымушанага ад’езду з Беларусі, цяпер жыве ў Кракаве, распавёў, што ў праекце «Тутэйшы Шляхціч» займаецца папулярызацыяй беларускай гісторыі, культуры.