У тэлерадыёкампаніі «Гродна» трое вядоўцаў заявілі, што хочуць асьвятляць падзеі аб’ектыўна. Іх адхілілі ад эфіру

Супрацоўнікі дзяржаўнай тэлерадыёкампаніі з Горадні падтрымалі агульнанацыянальныя патрабаваньні і заявілі, што гатовыя надаць пляцоўку для аб’ектыўнага асьвятленьня падзеяў.

Адначасова, як расказаў вядоўца ТРК «Гродна» Дзьмітры Лютомскі, трох вядоўцаў кампаніі Дзьмітрыя Чэкана, Дзьмітрыя Лютомскага і Сяргея Гадзяева кіраўніцтва адхіліла ад эфіраў.

Супрацоўнікі тэлерадыёкампаніі не абвяшчалі страйк, бо мяркуюць, што могуць быць карыснымі, даючы праўдзівую інфармацыю. Паводле Лютомскага, цяпер і так кампанія фактычна страйкуе, у эфір выходзяць толькі навіны надвор’я.

Зварот да старшыні Нацыянальнай тэлерадыёкампаніі Рэспублікі Беларусі Івана Эйсманта зьявіўся ў сацыяльных сетках ТРК «Гродна».

Супрацоўнікі абураныя падзеямі, якія адбываюцца ў Беларусі: грубымі парушэньнямі падчас выбарчай кампаніі; парушэньнем правоў і свабодаў грамадзянаў Беларусі; ціскам на журналістаў, цэнзурай у дзяржаўных СМІ.

• Яны падтрымалі патрабаваньні:

• прызнаць несапраўднымі вынікі выбараў;

• адправіць у адстаўку старшыню ЦВК Лідзію Ярмошыну;

• правесьці новыя прэзыдэнцкія выбары;

• не дапускаць гвалт над мірнымі грамадзянамі;

• усіх работнікаў праваахоўных органаў, якія незаконна ўжывалі гвалт, прыцягнуць да адказнасьці;

• вызваліць усіх палітвязьняў і затрыманых на мірных акцыях пратэсту;

• скасаваць цэнзуру ў дзяржаўных СМІ,

• даць магчымасьць аб’ектыўна асьвятляць падзеі.

«Цяпер мы гатовыя даць пляцоўку для канструктыўнага дыялёгу ў радыё- і тэлеэфіры як прыхільнікам, так і ня згодным зь дзейнай уладай», — гаворыцца ў звароце.

Калі патрабаваньні ня выканаюць да 21 жніўня, супрацоўнікі тэлерадыёкампаніі могуць пачаць бестэрміновы страйк.

Вечарам 17 жніўня дзяржаўная тэлевізія Горадні ўключыла адтуль жывую трансьляцыю.