У Менску зьніклі фатограф агенцтва «Россия сегодня» і галоўны рэдактар «Нашай Нівы». Пацярпелі некалькі журналістаў

Як паведамляе «РИА Новости», Ільля Піталёў перастаў выходзіць на сувязь каля 6‑й вечара 10 жніўня, у гэты час ён разам з калегамі быў у раёне гатэлю «Беларусь», Надалей зьвязацца зь ім не ўдавалася, паведамляе агенцтва. У бальніцу хуткай мэдыцынскай дапамогі, куды прывозяць пацярпелых падчас масавых акцый у Менску, Піталёў не паступаў, паведамілі «РИА Новости» ў мэдустанове. Пра здарэньне праінфармавалі расейскую амбасаду.

Каля 2‑й гадзіны ночы 11 жніўня ў Менску зьнік галоўны рэдактар выданьня «Наша Ніва» Ягор Марціновіч. Як паведаміў телеграм-канал выданьня, Марціновіч пасьпеў даслаць SOS-смс, гэта значыць, што ён затрыманы. «Мы ведаем, ён вяртаўся дадому на сваёй машыне пасьля асьвятленьня вулічных падзей», — піша рэдакцыя.

Пазьней ён даслаў яшчэ адно паведамленьне: што знаходзіцца ці то ў ЦІП, ці то ў Партызанскім РУУС, ня можа вызначыць па мясцовасьці. «Наша Ніва» зьвярнулася да прэс-сакратаркі МУС Вольгі Чамаданавай, яна паабяцала перадаць інфармацыю пра затрыманьне Марціновіча ў тры месцы, куды звозілі затрыманых учора. Прайшло 7 гадзін пасьля затрыманьня, але інфармацыі ад яго па-ранейшаму няма, напісала «НН» у 9.25 раніцы.

За два дні вулічных пратэстаў у Беларусі пацярпелі ад дзеяньняў сілавікоў некалькі журналістаў.

Увечары 10 жніўня ў раёне Кальварыйскай была параненая журналістка выданьня «Наша Ніва» Натальля Лубнеўская.

Падчас разгону пратэстаў затрымалі журналістак тэлеканалу «Белсат» Алёну Шчэрбінскую і Тацьцяну Белашову.

У Бабруйску 10 жніўня затрымалі журналіста Алеся Чыгіра і яго жонку Дануту, а таксама журналістаў Марыну Малчанаву і Віктара Масаловіча з «Бабруйскага кур’ера», у Берасьці — журналістаў Мілану Харытонаву і Алеся Леўчука.

Уначы стралялі ў фотакарэспандэнта Get­ty Images Міхала Фрыдмана. Куля трапіла ў акрэдытацыю, з журналістам усё ў парадку.

Беларуская асацыяцыя журналістаў паведамляе, што ў раёне Кальварыйскай вуліцы быў затрыманы рэжысэр-дакумэнталіст Максім Швед. Ён знаходзіцца ў ізалятары часовага ўтрыманьня на вуліцы Акрэсьціна.

Напярэдадні стала вядома, што падчас разгону пратэстаў пацярпеў журналіст «Медузы» Максім Солапаў. Затрымалі карэспандэнтаў Dai­ly Storm Антона Старкова і Дзьмітрыя Ласенка, разам зь імі ў аўтазаку апынуўся стваральнік праекту War­Gonzo Сямён Пегаў. Пазьней іх траіх вызвалілі.

Як стала вядома Tut.by, Сямён Пегаў знаходзіцца ў ізалятары на Акрэсьціна ў Менску. Дзьмітрыя Ласенку і Антона Старкова вызвалілі.