На незалежнага журналіста Змітра Лупача склалі чарговы адміністрацыйны пратакол
1 мая 2020
На журналіста-фрылансера з Глыбокага 30 красавіка міліцыянты склалі чарговы адміністрацыйны пратакол за супрацу з тэлеканалам “Белсат”. Яго аформіў усё той жа маёр міліцыі Глыбоцкага РАУС Сяргей Цырбан, які пільна сочыць за дзейнасцю журналіста ў інтэрнэце і маніторыць сюжэты з яго ўдзелам.
Змітра Лупача зноў вінавацяць у парушэнні Закона аб СМІ і прыцягваюць да адказнасці паводле часткі 2 артыкула 22.9 КаАП (незаконны выраб і (альбо) распаўсюд прадукцыі сродкаў масавай інфармацыі). Пакаранне за гэтае правапарушэнне прадугледжвае штраф у памеры ад 20 да 50 базавых велічынь (ад 540 да 1350 рублёў).
Праваахоўнікі распачалі справу з‑за відэасюжэта, паказанага ў праграме «Суб’ектыў» 10 красавіка. У ім распавядалася пра няякасны рамонт фізкультурна-аздараўляльнага цэнтра ў Глыбокім.
Як кажа Зміцер Лупач, міліцыянты апыталі сведкаў — людзей, у якіх ён браў інтэрвʼю, у тым ліку загадчыцу сектара спорту і турызму Глыбоцкага райвыканкама Таццяну Зеваліч. Таксама з санкцыі пракурора раздрукавалі яго тэлефонныя размовы.
Вінаватым журналіст-фрылансер сябе не лічыць, але зараз знаходзіцца ў чаканні суда. У Глыбоцкім РАУС паведамілі, што хутчэй за ўсё разгляд справы адбудзецца не пазней за 9 траўня.
Нагадаем, сёлета гэта ўжо чацвёртая адміністрацыйная справа, заведзеная ў дачыненні Змітра Лупача за супрацу з тэлеканалам “Белсат”.
@bajmedia
«Спрабуюць прымусіць мяне замаўчаць». Леанід Судаленка — пра новую крымінальную справу
04.03.2024
Беларускі фатограф Сяргей Гудзілін анансаваў выхад фотакнігі-архіва аб уласным досведзе эміграцыі
19.08.2024
Не забыць ніводнага, хто за кратамі. У Хельсінкі адкрылі стэнд пра калег за кратамі і размаўлялі пра падтрымку Беларусі
09.08.2024
ГУБАЗіК затрымаў вядучую і гукарэжысёра «Альфа радыё»
19.02.2024
