Расейская Дзярждума прапанавала да 5 гадоў турмы за фэйкі пра эпідэміі

Паводле паправак, апублікаваных на сайце ніжняй палаты расейскага парлямэнту, Крымінальны кодэкс прапаноўваецца дапоўніць новым артыкулам, які складаецца зь дзьвюх частак.

Першая – пра публічны распаўсюд заведама лжывай інфармацыі пра абставіны, якія ствараюць пагрозу жыцьцю і бясьпецы грамадзян. Такімі абставінамі ў дакумэнце называюцца эпідэміі, стыхійныя бедзтвы, якія прывялі да або здольныя прывесьці да чалавечых ахвяр або шкоды здароўю людзей. Пакараньне паводле гэтай часткі артыкулу прадугледжвае штрафы ад 300 тысяч да 700 тысяч расейскіх рублёў (каля $3700 – $8800), альбо абавязковыя работы на тэрмін да 360 гадзін, або папраўчыя работы на тэрмін да 1 году, альбо абмежаваньне волі на тэрмін да 3 гадоў.

Другая частка артыкулу прызначана на выпадак сьмерці або «іншых цяжкіх наступстваў», якія адбыліся праз хлусьлівую інфармацыю. У гэтым выпадку парушальніку будзе пагражаць штраф ад 1,5 да 2 мільёнаў рублёў (каля $18 800 – $25 000), папраўчыя работы на тэрмін да 2 гадоў, прымусовыя работы на тэрмін да 5 гадоў або пазбаўленьне волі на той жа тэрмін.