Эўрапейскі суд забараніў украінскім уладам доступ да дадзеных журналісткі Радыё Свабода

Пра гэта гаворыцца ў афіцыйным лісьце з Эўрапейскага суда па правах чалавека, атрыманым са Стразбуру рэдакцыяй Радыё Свабода ўвечары 18 верасьня.

Забарона на доступ да дадзеных з тэлефона журналісткі дзейнічае на працягу месяца — да 18 кастрычніка 2018 года. Гэты час даецца абароне Натальлі Сядлецкай для падрыхтоўкі і накіраваньні поўнай скаргі ў ЭСПЧ, якую суд будзе разглядаць «у прыярытэтным парадку», гаворыцца ў дакумэнце.

27 жніўня Пячэрскі раённы суд Кіева па патрабаваньні Генэральнай пракуратуры даў ёй дазвол атрымаць ад правайдэра інфармацыю па тэлефоне кіраўніцы праграмы журналісцкіх расьсьледаваньняў «Схемы» Радыё Свабода Натальлі Сядлецкай.

У пастанове гаворыцца аб прадстаўленьні доступу сьледзтва да званкоў і смс-паведамленьняў журналісткі зь ліпеня 2016-га па лістапад 2017-га году і да дадзеных аб месцазнаходжаньні яе тэлефона на працягу гэтых 17 месяцаў.

За гэты час рэдакцыя «Схем» ажыцьцявіла і апублікавала шэраг расьсьледаваньняў аб украінскіх чыноўніках, уключаючы дзейнасьць генэральнага пракурора Ўкраіны.

Сядлецкая разам з шэрагам іншых журналістаў праходзіць сьведкай па справе аб магчымым разгалошаньні дзяржаўнай таямніцы і дадзеных дасудовага расьсьледаваньня дырэктарам Нацыянальнага антыкарупцыйнага бюро (НАБУ) Арцёмам Сытнікам.

Натальля Сядлецкая — ляўрэатка шматлікіх журналісцкіх узнагародаў як украінскіх, так і міжнародных. Стыпэндыят прэміі імя Вацлава Гаўла за 2013–2014 акадэмічны год (сумесная праграма Радыё Свабода і МЗС Чэхіі). Пераможца шэрагу конкурсаў журналісцкіх расьсьледаваньняў. Чалец міжнароднай сеткі журналістаў-расьсьледавацеляў Orginized Crime and Cor­rup­tion Report­ing project (OCCRP).

«Схемы: карупцыя ў дэталях» — украінская штотыднёвая тэлевізійная праграма журналісцкіх расьсьледаваньняў і аналітыкі аб карупцыі ў вышэйшых эшалёнах улады, якая выходзіць у эфір з ліпеня 2014 году. Сумесны праект Радыё Свабода і тэлеканала «UA: Першы».