У Гродне распачалася выстава World Press Photo – 2018 ШМАТ ФОТА

Пра адметнасць экcпазіцыі распавядае каардынатар World Press Pho­to ў Беларусі Настасся Ранько:

— Культурна-адукацыйная прастора “ЦЭХ” прывозіць гэтую выставу ў Беларусь трэці раз, аднак сёлета Гродна стала першым рэгіёнам Беларусі, дзе будзе паказана экспазіцыя. Даволі складана было прывесці гэтую выставу ў рэгіёны, і мы знайшлі вельмі моцную каманду «Old City» і гродзенскіх валанцёраў, якія дапамаглі нам. Выстава будзе адкрытая для наведнікаў да 17 траўня. 

Кіраўніца гродзенскай суполкі ГА “Беларускай асацыяцыі журналістаў” Вольга Корсун лічыць гэтую выставу вялікай падзеяй для журналісцкай супольнасці:

— Даволі сімвалічна, што выстава такога высокага міжнароднага ўзроўню адкрылася ў Гродне ў Сусветны дзень свабоды прэсы. Тым больш, гродзенцы першымі пабачаць вынікі працы міжнароднага конкурсу сусветнай фатаграфіі. Мастацкі ўзровень прац журналістаў, здымкі якіх паказаныя на выставе, вельмі высокі і гэта робіць выставу адметнай.

Фотажурналіст, прызёр міжнародных фотаконкурсаў і сябра ГА “БАЖ” Аляксандр Саенка лічыць выставу знакавай для жыхароў Гродна:

— Гледачам і звычайным фатографам трэба павучыцца ў майстроў, як здымае сусветная прэса. Тут можна ўбачыць абсалютна ўсе бакі фотажурналістыкі: паказаныя прырода, войны і сацыяльнае жыццё. Мне асабіста на гэтай выставе спадабаліся здымкі з гарачых кропак – як адбываліся гэтыя здымкі, эмоцыі.

Куратар і менеджар выставы І Вэнь Ся (Yi Wen Hsia) правяла для ўсіх жадаючых імправізаваную экскурсію і падрабязна распавяла пра здымкі, якія прывезлі ў Гродна.

— Працы майстроў сусветнай фатаграфіі можна будзе пабачыць ў Гродне да 17 траўня, пасля экспазіцыя пераедзе ў Мінск, дзе будзе дэманстравацца ў прасторы “Корпус”.