Журналістку Край.by не пусцілі на пасяджэнне Маладзечанскага райвыканкама. Дзяржаўных журналістаў — пусцілі

Паведамленне пра дату, час і месца правядзення афіцыйнага мерапрыемства было апублікаванае на сайце райвыканкама..

Аднак выканаць свае прафесійныя абавязкі Кацярына Сушко не змагла. 24 лістапада ля дзвярэй у канферэнц-залу яе спыніла Валянціна Даўбенка – галоўны спецыяліст сектара ідэалагічнай працы, культуры і па справах моладзі Маладзечанскага райвыканкама. Аргументацыя нядопуску журналіста недзяржаўнага СМІ на афіцыйнае мерапрыемства была выкладзена В. Даўбенка наступным чынам: “На пасяджэнні прысутнічаюць нашы СМІ, заснавальнікамі якіх мы з’яўляемся. У мяне ёсць спіс запрошаных людзей – вас там няма, у вас адсутнічае акрэдытацыя на дадзенае мерапрыемства, у вас няма рэдакцыйнага задання”.

Пасля апісанага выпадку рэдакцыя партала Край.by звярнулася ў Маладзечанскі райвыканкам з просьбай прадставіць палажэнне аб парадку акрэдытацыі прадстаўнікоў СМІ пры райвыканкаме ў мэтах азнаямлення і наступнай акрэдытацыі свайго журналіста.

Кацярына Сушко таксама накіравала ў Маладзечанскі райвыканкам і пракуратуру Маладзечанскага раёна скаргі на дзеянні супрацоўніцы райвыканкама В. Даўбенка, якая, на думку карэспандэнта Край.by, незаконна перашкаджала ажыццяўленню прафесіянальнай дзейнасці журналіста.

Журналістка звяртае ўвагу кампетэнтных органаў на тое, што, згодна з нормамі Закона “Аб інфармацыі, інфарматызацыі і абароне інфармацыі”, інфармацыя пра сацыяльна-эканамічнае развіццё Рэспублікі Беларусь і яе адміністратыўна-тэрытарыяльных адзінак з’яўляецца агульнадаступнай і не можа быць абмежаванай. Тым больш на такой падставе, як адсутнасць СМІ у ліку тых, якія зацверджаныя выканаўчай уладай.

На сайце Маладзечанскага райвыканкама і ў іншых адкрытых крыніцах адсутнічаюць звесткі пра парадак акрэдытацыі пры райвыканкаме прадстаўнікоў СМІ. Валянціна Даўбенка такую інфармацыю Кацярыне Сушко не прадаставіла.

Між тым, нормамі закона “Аб сродках масавай інфармацыі” вызначаны абавязак журналіста СМІ пры ажыццяўленні прафесійнай дзейнасці прад’яўляць па патрабаванні службовае пасведчанне (што і было зроблена журналісткай Край.by). Абавязак журналіста СМІ прад’яўляць па патрабаванні рэдакцыйнае заданне нормамі закона не замацаваны.