На журналістку Тамару Шчапёткіну ў Кобрыне склалі пратакол за “незаконны выраб і распаўсюд прадукцыі СМІ”
1 лістапада 2017
Пратакол быў складзены 31 кастрычніка ўчастковым інспектарам Кобрынскага РАУС маёрам міліцыі Юрыем Свідуновічам паводле сумна вядомага артыкула 22.9 Кодэкса аб адміністратыўных правапарушэннях.
З пратакола вынікае, што Тамара Шчапёткіна 28 верасня знаходзілася ў будынку суда Кобрынскага раёна і парушыла патрабаванні Закона РБ “Аб сродках масавай інфармацыі”, бо “ажыццяўляла незаконны выраб і ў далейшым распаўсюд прадукцыі сродкаў масавай інфармацыі”, не маючы акрэдытацыі ў якасці карэспандэнта замежнага СМІ – “Беларускага Радыё Рацыя” (Польшча).
Парушэнне заканадаўства супрацоўнік міліцыі ўбачыў у тым, што Тамара Шчапёткіна асвятляла судовы працэс і брала каментары ў некаторых яго ўдзельнікаў. Сярод іншага, адным з удзельнікаў гэтага працэсу быў маёр міліцыі ў адстаўцы і цяперашні юрыст сельгаспрадпрыемства “Гарадзец-Агра” Анатоль Джыга. Незалежная журналістка мяркуе, што менавіта ён звярнуўся да сваіх былых калег з адпаведнай заявай, а падчас складання пратакола пазначаны як сведка.
Тамара Шчапёткіна распавяла службе маніторынгу ГА “БАЖ”, што нязгодная з выстаўленымі ў дачыненні да яе абвінавачваннямі, пра што пакінула заўвагу ў змесце міліцэйскага пратакола. Неўзабаве гэты пратакол мусіць трапіць па месцы жыхарства журналісткі ў Бярозу (Брэсцкая вобласць), дзе і адбудзецца суд.
@bajmedia
