«Рэтра-сукенка» і «Анатомія цела» — цікавая фотавыстава да Дня людзей сталага веку

Гэтыя два праекты паказаныя шырокаму колу гараджан упершыню, распавядае Варвара Злобіна, асістэнтка дырэктара праграмы «Універсітэт залатога веку»:

— Гэта вельмі важна, бо мы робім шмат цікавых праектаў, але часта яны застаюцца ў межах універсітэта. Нам было важна падзяліцца тым, што мы маем, з горадам.

У праектах удзельнічалі нашы студэнткі, слухачкі УЗВ, яны фатаграфаваліся ў нейкіх сваіх паўсядзённых умовах, ці спецыяльна рыхтаваліся да выставы. На той частцы выставы, што называецца «Анатомія цела», было важна паказаць, што прыгажосць не залежыць ад стандартаў, якія мы зараз маем.

Другі праект — гэта «Рэтра-сукенка». Маладыя дзяўчаты фатаграфаваліся ў рэтрасукенках, якія прынеслі слухачкі Універсітэта залатога веку.

Гэтым сукенкам шмат гадоў: ёсць сукенкі 1930‑х, ёсць такія, якія знайшлі на гарышчы і якім невядома колькі год, невядома колькі яна там праляжала. І няма ўжо жанчыны, якая яе шыла, і сваякоў яе не засталося. Гэтыя сукенкі з гісторыяй, і нам было важна паказаць, што сукенкі гэтыя былі прыгожыя тады і цяпер яны вельмі арганічна глядзяцца.

Я сама ёсць на гэтых здымках і я апранута якраз у такую сукенку, якая была знойдзена на гарышчы, і ёй невядома колькі гадоў. Мяне здзівіла, што яна пашыта цалкам рукамі, і там няма ні “маланкі”, ні гузікаў, такіх сучасных, ні машыннай строчкі. Але яна сядзіць па фігуры і вельмі акуратная, бо была вялікая праца жанчыны, што рабіла яе. Другая сукенка, у якой я ёсць на фота, — гэта сукенка, якую шыла бабуля Ланы Руднік. Але з улікам колькі гэтая рэч праляжала ў шафе, яна неверагодна сучасна і модна глядзіцца.

Фотавыставу праектаў можна будзе паглядзець цягам бліжэйшых двух тыдняў.