Рашэнне эканамічнага суда Брэсцкай вобласці, якое патрабуе выдаліць з інтэрнэту відэаролік незалежнага блогера, пакінулі без зменаў

Гаворка ідзе пра рашэнне эканамічнага суда Брэсцкай вобласці ад 4 жнiўня 2017 года. Згодна яму, шэраг звестак, распаўсюджанага праз інтэрнет відэароліка “Дынамаўская афера” судом “прызнаныя не адпаведнымі рэчаіснасці і зневажаюць дзелавую рэпутацыю вытворча-гандлёвага ўнітарнага прадпрыемства “Дынама Цэнтр” Беларускага фізкультурна-спартыўнага таварыства “Дынама”.

Аўтарам відэароліка — відэаблогеру Сяргею Пятрухіну і актывісту руху «За Свабоду» Дзянісу Турчаняку – гэтым рашэннем было забаронена распаўсюд відэароліка, у тым ліку яго размяшчэнне на любых рэсурсах сеткі інтэрнет.

Акрамя таго, суд абавязаў аўтараў відэароліка, на сайтах, дзе ён быў размешчаны, а таксама на сваіх старонках у сацыяльнай сетцы “Вконтакте” зрабіць абвяржэнне праз відэазварот з наступным зместам: “Звесткі, названыя ў відэароліку “Дынамаўская афера”, не адпавядаюць рэчаіснасці і ганяць дзелавую рэпутацыю УП “Дынама Цэнтр”. Аўтары відэароліка таксама абавязаны кампенсаваць прадпрыемству “Дынама Цэнтр” выдаткі на дзяржаўную пошліну.

Сяргей Пятрухін і Дзяніс Турчаняк стварылі згаданы відэаролік у лютым 2017 года. Яны распавялі  пра зямельны ўчастак, які быў прадастаўлены ў арэнду УП “Дынама Цэнтр”. Аўтары расследвання выказалі меркаванне пра тое, што прадпрыемства атрымала зямлю ў раёне рынку “Кавалёва” ў Брэсце з дапамогай “шэрай” схемы (цяпер на гэтым участку знаходзіцца буйны гандлёвы аб’ект). У вытворча-гандлёвым ўнітарным прадпрыемстве “Дынама Цэнтр”, якое належыць БФСТ “Дынама”, не пагадзіліся з блогерамі і падалі на іх у суд. Той вырашыў, што інфармацыя ў расследаванні Пятрухіна і Турчаняка зневажае дзелавую рэпутацыю “Дынама Цэнтра”.