Начальнік Лоеўскай міліцыі прайграў суд журналісту-фрылансеру

Падпалкоўнік міліцыі Бухаўцоў патрабаваў прызнаць відэаматэрыялы Жукоўскага абразлівымі для яго гонару і дзелавой рэпутацыі  і спагнаць з адказчыка грашовую кампенсацыю ў памеры 2 тысячы рублёў з пералічэннем іх на рахунак дома сямейнага тыпу ў Лоеве.

Прадстаўнік фрылансера ў судзе, юрыст Леанід Судаленка, які па даверанасці Беларускай асацыяцыі журналістаў прадстаўляў ягоныя інтарэсы, патлумачыў:

“Калегія Гомельскага абласнога суда не знайшла падставаў адмяніць рашэнне суда Цэнтральнага раёна Гомеля, і цяпер гэтае рашэнне набыло юрыдычную моц. Пазоўнік у судзе “плаваў”, не мог падаць ніводнага сур’ёзнага аргумента віны журналіста. Суддзя Ірына Званко, разглядаючы справу аб абароне гонару і годнасці, імкнулася рабіць гэта аб’ектыўна, давала міліцыянту тэрмін удакладніць патрабаванні. Аднак Бухаўцоў на кожным новым пасяджэнні аспрэчваў “у цэлым” відасюжэты, адзін з якіх быў паказаны тэлеканалам “Белсат”. Пасля чатырох пасяджэнняў суддзя адхіліла пазоў у поўным аб’ёме, стварыўшы тым самым прэцэдэнт, скіраваны на дадатковую абарону журналіста ад неабгрунтаваных прэтэнзіяў”.

Падпалкоўніку прапанавана звярнуцца з пазовам непасрэдна да польскага нацыянальнага тэлебачання, у склад якога ўваходзіць спадарожнікавы тэлеканал «Белсат».

Уладзімір Бухаўцоў прад’явіў Жукоўскаму і тэлеканалу «Белсат» пазоў за відэасюжэты «Міліцыянты бʼюць журналістаў, каб прыхаваць вынікі эканамічнага заняпаду» і «Будзённае жыцьцё рэгіёну Лоеў», але не здолеў канкрэтна сфармуляваць, якія выразы ці словы прынізілі яго гонар, годнасць і дзелавую рэпутацыю.

Лоеўскай міліцыянт, у прыватнасьці,  спасылаўся на выраблены Жукоўскім відэаматэрыял, у якім паказаныя кадры  з яго удзелам і тытрамі «МУС — гестапа»? Пры гэтым у сюжэце жыхары Лоева распавядалі пра беззаконне, якое дазвалялі сабе мясцовыя міліцыянты ў дачыненні да герояў ды іхніх знаёмых.

З гвалтам затрымлівалі ў Лоеве міліцыянты і самога фрылансера Жукоўскага, калі ён з напарнікам праз відэаздымкі імкнуўся адлюстраваць эканамічную сітуацыю ў райцэнтры. Выклікалі міліцыянтаў “прыструніць” незалежных журналістаў намесніца старшыні Лоеўскага райвыканкаму па ідэалогіі Наталля Кавурава і кіраўніца спраў райвыканкаму Ірына Пастухова.