Сёння суд над журналісткамі Абакунчык і Бахвалавай у Оршы (ФОТА, АБНАЎЛЯЕЦЦА)

Галіна Абакунчык затрымлівалі падчас «хапуну», сілай заштурхнулі ў машыну, ні з чым не знаёмілі, прымусілі распрануцца, усе рэчы забралі. Суд адхіліў хадайніцтва аб выкліку сведак.

«Супрацоўнікі амапу проста гвалтам схапілі і пацягнулі нас у машыну. Журналісцкае пасведчанне ніхто нават не глядзеў. у камеры нас спачатку трымалі больш за 3 гадзіны, пры гэтым гаварылі, што мы не затрыманыя. Паводзіліся бесцырымонна і груба. У дргуім аддзяленні міліцыі завялі на вобшук, забралі ўсе рэчы і толькі пасля гэтага прыйшлі з пратколам.

Я лічу, што гэта беззаконне, якое было магчыма, хіба, у сталінскія часы. Цяпер толькі што не страляюць.

Міліцыя вядзе вайну з інфармацыяй. Міліцыя сёння гарант беззаконня. Ніхто міліцыю не дыскрэдытуе, яна сама гэта робіць. Тыя парадкі, якімі карыстаюцца міліцыянты — гэта проста 1937‑ы год», — заявіла падчас суда спадарыня Галіна Абакунчык.

Пачынаюць судзіць Галіну Абакунчык.

Рэдактару віцебскай маланакладнай газеты і сайта orshatut.by Віктару Андрэеву прысудзілі 13 сутак арышту за ўдзел у несанкцыяваным масавым мерапрыемстве.

Першым будуць судзіць рэдактара віцебскай маланакладнай газеты Віктара Андрэева (спіс журналістаў, затрыманых 12 сакавіка). На 14.15 прызначаны суд Кацярыны Бахвалавай, на 15.00 — Паўла Севярынца.

У 11.38 прывезлі затрыманых у будынак суда. Неўзабаве пачнуцца працэсы.

Пакуль у аршанскім судзе нічога не адбываецца, людзі чакаюць развіцця падзей. На вуліцы і ў самім будынку ўзмоцненыя міліцэйскія патрулі. Але атмасфера пакуль даволі прыязная.

Супраць незалежных журналістак Галіны Абакунчык і Кацярыны Бахвалавай складзены адміністрацыйныя пратаколы за непадпарадкаванне супрацоўнікам міліцыі. Да суда яны застануцца ў ізалятары часовага ўтрымання.

Суд Аршанскага раёна і г. Орша знаходзіцца па адрасе: вул.Савецкая, 5. Цяпер у будынку суда знаходзіцца каля 20 мясцовых грамадскіх актывістаў, журналістаў.

Таксама ў судзе знаходзяцца юрыст ГА «БАЖ» Алег Агееў і прэс-сакратар журналісцкага аб’яднання Барыс Гарэцкі.

Нагадаем, што журналісткі асвятлялі нядзельную акцыю пратэсту ў Оршы і былі затрыманыя пасля яе завяршэння. Галіна Абакунчык мела пры сабе афіцыйную акрэдытацыю Міністэрства замежных спраў Беларусі ў якасці карэспандэнта “Радыё Свабода”.

Галіна Абакунчык была затрыманая па заканчэньні акцыі пратэсту ў Воршы міліцыянтамі ў цывільным і ў форме, якія не прадставіліся. Галіна вяла жывы рэпартаж з акцыі. Як распавялі сведкі здарэння, у пастарунак яе даставіў супрацоўнік у цывільным.  А 22‑й гадзіне Галіна патэлефанавала калегам ужо з ізалятару, сказала, што ёй дазволілі зрабіць званок у парадку выключэння. Голас яе быў бадзёры, яна сказала, што яе будуць судзіць за ўдзел у несанкцыянаванай акцыі. 

Пасля затрымання міліцыянты доўгі час вялі разбіральніцтва і ўрэшце рэшт склалі на карэспандэнтак адміністрацыйныя пратаколы.