Кандыдаты ў дэпутаты павінны прадаставіць у СМІ свае праграмы не пазней за 21 жніўня

Перадвыбарныя праграмы будуць публікавацца ў такіх рэспубліканскіх газетах, як «Звязда», «Рэспублiка», у абласных газетах, а таксама ў «Вечернем Минске», удакладніла Алена Дмухайла. Чарговасць публікацыі будзе адпавядаць чарговасці паступлення тэкстаў у рэдакцыі. Што датычыцца тэлебачання і радыё, то ў Мінску кандыдатам прадаставяць эфір тэлеканал «Беларусь 3» і «Радыё-Мінск». Раней прапаноўвалася выдзеліць сталічным кандыдатам эфір на «Беларусь 2», але пазней ад гэтага адмовіліся з‑за трансляцыі Алімпійскіх гульняў з Рыа-дэ-Жанэйра. У Мінскай вобласці эфір выдзеляць на СТБ і «Мінскай хвалі». Кандыдаты ў іншых рэгіёнах змогуць выступіць у эфіры абласных тэле- і радыёстанцый. Пры гэтым і ў тэле‑, і ў радыёэфіры будзе давацца па пяць мінут. Трансляцыі па тэлебачанні пройдуць з 19.00 да 20.00, а на радыё — з 7.00 да 8.00. Прадугледжаны і тэледэбаты, дзе кожнаму кандыдату дадуць да пяці мінут. Для правядзення дэбатаў патрэбна згода на ўдзел хаця б ад двух кандыдатаў адной акругі. Дэбаты пакажуць у запісе, а час трансляцыі вызначаць акруговыя выбаркамы не пазней за 12 жніўня. Прычым на дэбаты можа прыйсці давераная асоба. Акрамя таго, кандыдаты будуць мець права на выкуп друкаванай плошчы ў газетах і ў эфіры тэлерадыёкампаній за кошт сваіх выбарчых фондаў.-
Чытаць поўнасцю: http://blr.belta.by/politics/view/kandydaty-u-deputaty-pavinny-pradastavits-u-smi-svae-pragramy-ne-paznej-za-21-zhniunja-48267–2016/
Пры любым выкарыстанні матэрыялаў актыўная гіперспасылка на blr.belta.by абавязковая