Судны дзень на Гомельшчыне: Жукоўскаму — 40 базавых, справу Шчыраковай спынілі (абноўлена)

4 лютага Буда-Кашалёўскі раённы суд разгледзеў адміністрацыйную справу ў дачыненні да гомельскага журналіста-фрылансера Кастуся Жукоўскага. Жукоўскага звінавацілі ў “вырабе і распаўсюдзе прадукцыі СМІ” без акрэдытацыі для спадарожнікавага тэлеканала “Белсат” (арт. 22. 9 КаАП). Суддзя Уладзімір Пракапенка пастанавіў аштрафаваць журналіста на 40 базавых велічынь (8 млн 400 тыс. рублёў). Ён не дапусціў да ўдзелу у разглядзе адміністрацыйнай справы юрыста Леаніда Судаленку, які збіраўся прадстаўляць інтарэсы Жукоўскага па даверанасці Гомельскай філіі ГА “БАЖ” .

У той жа дзень суд Савецкага раёна Гомеля разглядаў адміністрацыйны пратакол паводле арт. 22.9 КаАП у дачыненні да Ларысы Шчыраковай. Суддзя Алена Шайн спыніла справу за “адсутнасцю падзеі адміністрацыйнага правапарушэння, прадугледжанага ч. 2 арт. 22.9  КаАП Рэспублікі Беларусь”. Даты здзяйснення журналісткай “правапарушэння”, указаныя ў міліцэйскім пратаколе і ў рапарце, не супадаюць. Падставай для адміністрацыйнай справы Ларысы Шчыраковай, нагадаем, быў зняты ёй відэасюжэт пра жыллёвыя ўмовы ў доме №8 па вуліцы Касмічнай у Гомелі.

Што да Кастуся Жукоўскага — нагодай для яго пераследу стаў відэаматэрыял з Буда-Кашалёва “Расія спыняе беларускія заводы”, паказаны 16 снежня 2015 года. У ім ішла гаворка пра фінансавае становішча Буда-Кашалёўскага масласырзавода.

Яшчэ два аналагічныя пратаколы за нібыта незаконны выраб і распаўсюд прадукцыі СМІ склалі ў дачыненні да Жукоўскага міліцыянты Веткаўскага РАУС. Падставай для гэтага сталі два знятыя ім сюжэты: адзін – датычна гаротнага стану мясцовых прадпрыемстваў, другі – пра вучобу ў малодшых класах лаўрэаткі Нобелеўскай прэміі Святланы Алексіевіч у вёсцы Прысна Веткаўскага раёна (“Шлях Алексіевіч на Алімп”).

Даты разгляду пратаколаў у Веткаўскім раённым судзе пакуль невядомая. З улікам папярэдніх штрафаў журналіст-фрылансер мусіць сплаціць у дзяржаўны бюджэт 45 мільёнаў 150 тысяч рублёў.

Канвэер перасьледу журналістаў-фрылянсэраў спыніўся ў судзе Савецкага раёну Гомеля

ГА “БАЖ” звярнулася ў Адміністрацыю Прэзідэнта з нагоды пераследу журналістаў-фрылансераў

ЕФЖ адрэагавала на новую хвалю пераследу журналістаў

Ларыса Шчыракова: гэты пратакол — помста за 30 тысяч праглядаў мітынгу прадпрымальнікаў

Штрафы журналістам па арт. 22.9 КаАП (Табліцы, абнаўляецца)