Сачыце за далейшымі публікацыямі

«Ведь газета, на мой взгляд, так же, как и художественное произведение: надо получать удовольствие от того, что её читаешь…»
З інтэрвію Н. Пяткевіч агенцыі БелаПАН

Нагодай для выкарыстаньня гэтай цытаты ў якасьці эпіграфу сталася публікацыя галоўнай газэтай краіны ліста вядомай апазыцыянэркі В. Карач.

Ну, і што ж тут такога? Надрукавала і добра. Нарэшце, і апазыцыянэры атрымалі доступ да дзяржаўных СМІ. У краіне ўсё ж лібэралізацыя.

А «такога» тут тое, што, як сьвярджае сп. Карач, па-першае, яна аніякага ліста не дасылала, па-другое, газэта выкінула кавалак тэкста, у якім крытыкуецца палітыка А. Лукашэнкі, а, па-трэцяе, сказіла сутнасьць допісу.

Як сьцвярджае палітык, «У артыкуле гаворка ідзе менавіта пра праймэрыз, а не — як піша «Советская Белоруссия» — «пра некаторыя палітычныя норавы».

Карацей, зь ліста В. Карач «СБ» зрабіла «художественное произведение». Памяняла шматнакладная газэта і назву: у арыгінале было «Люстэрка для кандыдата ці яшчэ раз пра праймэрыз», а стала «У лоб ці па лбе». Зьмененая назва, між іншым, не выпадковая, а сымбалічная. Бо, як вынікае з камэнтароў зацікаўленых апазыцыйных палітыкаў, што прагучалі ў этэры Радыё «Свабода», задача публікацыі палялага, відаць, у тым, каб сутыкнуць іх ілбамі. Што і атрымалася.

Вядома, такая публікацыя ня можа не выклікаць задавальненьня. Канечне ж, — у той часткі беларускага электарату, якая з наіўным піетэтам ставіцца да сёньшняй беларускай улады і зь нянавісьцю — да ўсіх яе «ворагаў». Задавальненьне атрымалі, відаць, і «майстры» пяра, што працуюць у «СБ».

Праўда, як быць з патрабаваньнямі прафэсійнай журналісцкай этыкі? Бо выпадак падлягае, насамрэч, маральнай ацэнцы. Да таго ж, цікава: а як яго трактаваць «у святле» намаганьняў афіцыйных журналістаў стварыць «адзіны і новы» Кодэкс журналісцкай этыкі?

Дзеля чаго ствараць новы? Каб чорнае можна было б назваць белым?! Карацей, сачыце за далейшымі публікацыямі ў «СБ». Прэзыдэнцкая кампанія распачалася!